Bipo Mipela i Olsem Ol Weldok—Nau Mipela i Olsem Ol Sipsip!
Taim mitupela Sakina i liklik meri yet, mipela i save sindaun long wankain hap. Sakina i gat bikpela skin na em i strong, tasol mi sotpela na bun nating. Mitupela i save tok pait planti taim, tasol long wanpela taim mitupela i pait nogut tru. Kirap long dispela taim na i kam, mitupela i no toktok moa na tok gude. Bihain, mipela i lusim dispela hap na go sindaun long narapela narapela hap, na mipela i no save narapela i stap we.
Long 1994, mi kirap stadi long Baibel wantaim ol Witnes Bilong Jehova, na isi isi pasin bilong mi i senis. Fopela yia bihain taim mi go long bikpela de kibung bilong mipela long Bujumbura, Barundi, mi kirap nogut long bungim Sakina. Mi amamas long em i stap long dispela kibung, tasol taim mipela i tok gude mipela i no kamapim tumas amamas bilong mitupela. Bihain long dispela de yet, mi kirap nogut taim mi lukim em i stap namel long ol man i laik kisim baptais! Em tu i bin senis tru. Em i no moa dispela meri bilong pait em planti taim mi bin tok pait wantaim em. Em gutpela samting tru long lukim em i sanap long ai bilong ol narapela na kamapim dediket bilong em long God long rot bilong kisim baptais long wara!
Taim em i lusim wara na kam antap, kwiktaim mi go holimpas em na mi toktok isi long yau bilong em: “Yu tingim pasin bilong yumi long pait?” Em i tok: “Yes, mi tingim, tasol em samting bilong bipo. Mi kamap nupela meri nau.”
Mitupela wantaim i amamas long mipela i bin painim tok i tru bilong Baibel i save kamapim pasin wanbel, na i bin senisim pasin bilong mipela i olsem bilong weldok i kamap olsem bilong sipsip bilong Bikpela Wasman, God Jehova. Tru tumas, tok i tru bilong Baibel i save senisim laip bilong ol man.