“Nau Mi Save Long Samting i Kamap Long Mi!”

WANPELA man long Tokyo i pilim olsem taim em i ritim stori bilong wanpela man i stap long Wastaua bilong Disemba 1, 2000. Nem bilong dispela stori em ‘Yu No Save Wanem Samting Bai Painim Yu Long Tumora,’ na i stori long samting i painim wanpela brata i mekim wok misineri long bipo na em i kisim sik bilong tingting (manic-depressive psychosis).

Long pas em i salim long ol man bilong wokim dispela nius, dispela man bilong Tokyo i tok olsem: “Ol mak bilong dispela sik em nius i stori long en i stret tru long mi. Olsem na mi go lukim dokta long haus sik na dokta i tokim mi olsem mi gat sik bilong tingting. Dispela dokta i bin skelim sik bilong mi em i kirap nogut. Em i tok, ‘Ol man i gat dispela sik ol i no save ting olsem ol i sik.’ Dispela stori i bin helpim mi long painimaut dispela sik na em i no kamap bikpela tru.”

Planti milion manmeri long olgeta hap bilong graun em ol i save ritim ol nius Wastaua na poroman bilong en Kirap! ol i save kisim kain kain helpim. Ol i amamas long ritim dispela nius na em i gat planti gutpela stori long en. Long nau ol i wokim nius Wastaua long 141 tok ples, na Kirap! long 86 tok ples. Yu tu bai amamas long ritim Wastaua na Kirap! long olgeta taim.