Ol Samting i Bagarapim Ol Diwai

LONG taim bilong ol man i bin raitim Baibel, ol diwai i olsem ol gutpela samting tru. Olsem: Taim Abraham i baim wanpela hap graun bilong planim gutpela meri bilong em, Sara, em i kisim tu ol diwai i sanap long dispela hap graun.​​—⁠Stat 23:​15-​18.

Long nau tu, ol diwai i bikpela samting, na long olgeta hap bilong graun ol man i tingting strong long lukautim ol bikbus. Buk State of the World 1998 i tok: “Planti man long ol kantri long hap not i tingting planti long ol bikbus i stap long ples hat em ol man i wok long bagarapim, tasol ating ol i no save olsem ol bikbus long hap bilong ol yet i wok long bagarap long ol kain kain samting, winim bikbus bilong ol narapela hap.” Wanem samting i wok long bagarapim ol bikbus long ol kantri long hap not bilong Yurop na Not Amerika? Planti man i sutim tok long pasin bilong katim olgeta diwai i stap long wanpela hap, tasol i gat ol narapela samting i wok long bagarapim ol diwai isi isi. Wanem ol dispela samting? Em smok nogut i stap long win na ol marasin nogut i stap long ren. Dispela ol samting nogut inap mekim na ol diwai i no inap sakim ol binatang na sik i save kisim ol diwai na nau ol i bagarap.

Inap planti yia, ol man bilong lukautim wara, win, na graun samting, na ol narapela man i tingim tru ol bikbus, ol i tokaut strong long lukautim ol samting i save wok gut wantaim bilong helpim graun long i stap gut. Long 1980 samting, bihain long taim ol saientis bilong Jemani i skelim ol samting em smok nogut long win na marasin nogut long ren bai mekim long graun, ol i tok: ‘Sapos yumi no mekim wanpela samting, ating long yia 2000, bai i no gat ol bikbus. Ol man bai lukim ol dispela samting long ol olpela poto na long piksa wokabaut tasol.’ Tasol gutpela tru, graun i gat strong bilong stretim na kamapim bek ol samting, olsem na ol bikbus inap sakim dispela bagarap ol i tok bai kamap.

God tasol bai mekim ol samting bilong helpim graun long i stap gut. “Yu stap long ples bilong yu antap na yu save salim ren i kam daun long ol maunten” na “yu save mekim gras i kamap bilong ol bulmakau i ken kaikai, na olkain samting mipela manmeri i save planim.” Na God i tok promis pinis olsem em bai “bagarapim ol man i bagarapim graun.” (Song 104:​13, 14; KTH 11:18) Em bai gutpela tru taim olgeta manmeri bilong graun i stap long klinpela graun inap oltaim oltaim!​​—⁠Song 37:​9-​11