“Mipela i Save Kisim Lait Long Yu Tasol”
LAIT i wanpela samting em planti taim yumi no save tingim i go inap long taim pawa i dai na yumi yet na ol haus klostu i stap long tudak. Yumi amamas long ‘haus pawa’ bilong yumi i stap antap—em san—i save stap oltaim na i no inap pinis. Lait bilong san i helpim yumi na yumi ken lukluk, kaikai, pulim win, na i stap laip.
Lait i bikpela samting bilong helpim ol samting long i stap laip, olsem na Buk Stat i tok, lait i bin kamap long namba wan de bilong God i wokim ol samting. “Na God i tok olsem, ‘Lait i mas kamap.’ Orait lait i kamap.” (Stat 1:3) Ol man bilong lotu long God olsem King Devit, oltaim ol i luksave olsem Jehova em i As bilong laip na lait. Devit i tok: “Yu as tru bilong laip bilong olgeta samting. Na yu as bilong lait. Mipela i save kisim lait long yu tasol, na mipela i stap gut.”—Song 36:9.
Tok bilong Devit i stret long lait tru na samting lait i piksa bilong en. Buk Encyclopædia Britannica i tok: “Tru tumas, lait yet i mekim na ai inap lukluk.” Em i tok moa: “Planti save i stap long kru bilong ol man, ol i kisim long rot bilong ai, winim save yumi kisim long rot bilong ol narapela hap bilong bodi.” Planti samting yumi lain long en i kam long rot bilong ai—na i mas i gat lait bambai ai i ken wok gut—olsem na Baibel i save mekim tok piksa long lait bilong makim narapela samting.
Jisas i tokim ol disaipel bilong em: “Mi yet mi lait bilong graun. Man i bihainim mi, em bai i no inap wokabaut long tudak. Nogat. Em bai i gat lait bilong laip.” (Jon 8:12) Tok piksa bilong Jisas long lait i makim tok i tru em i autim, em dispela tok inap givim lait long tingting na bel bilong ol man i harim tok bilong em. Pastaim ol disaipel i bin i stap long tudak bilong spirit inap planti yia, tasol bihain ol inap kisim gut save long ol samting God i laik mekim bilong helpim ol man, na ol i ken wetim ol gutpela samting Kingdom bai mekim bihain. Tru tumas, dispela em i “lait bilong laip,” long wanem, dispela save inap stiaim ol i go bilong kisim laip i stap oltaim oltaim. Long beten em i mekim long Papa bilong em long heven, Jisas i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Krais Jisas.” (Jon 17:3, NW ) Olsem na yumi no ken ting dispela lait bilong spirit em i liklik samting!