“Marasin Bilong Putim Long Ai Bilong Yu”

LONG taim bilong ol aposel, Jisas Krais i mekim dispela tok long kongrigesen Kristen long Laodisia, long Esia Maina.

Jisas i tok: “Baim marasin bilong putim long ai bilong yu, na bai yu inap lukluk [gut].” Em i no wanpela sik bilong ai tru ol i mas oraitim; ol i aipas long ol samting bilong spirit. Ol Kristen bilong Laodisia i stap long wanpela taun i gat planti samting bilong skin, na dispela i stiaim tingting bilong ol na ol i no tingim moa ol samting bilong spirit ol i mas kisim.

Jisas i tok dispela em i as na ol i no inap lukluk gut, na em i tok: “Yu save tok olsem, ‘Mi gat planti mani, na mi gat planti samting i stap. Mi no sot long wanpela samting.’ Tasol nogat. Yu stap nogut tru, inap long ol man i ken sori tru long yu. Yu stap rabis tru na yu aipas na yu stap as nating. Na yu yet yu no save long dispela.” Maski ol i no tingim dispela, ol brata sista long kongrigesen i mas kisim “marasin bilong putim long ai.” Ol inap kisim dispela samting sapos ol i daun long ol tok Jisas Krais i mekim bilong skulim na stretim ol. Jisas i tokim ol long “baim” long em.​—⁠KTH 3:​17, 18.

Olsem ol Kristen i bin stap long Laodisia, ol trupela Kristen long nau ol i mas was gut, nogut pasin bilong ol man long tingim mani kago na ol amamas bilong skin i stiaim tingting bilong ol. Ating ol i no tingim na dispela samting inap kamap. Samting bilong helpim yumi long stap gut long ol samting bilong spirit i stap long dispela tok: ‘Baim long Jisas marasin bilong putim long ai bilong yu, na bai yu inap lukluk.’

Yumi mas tingim olsem man i mas baim dispela “marasin bilong putim long ai.” Em i gat pe long en. Man i mas lusim hap taim bilong stadi na tingim tingim Tok Bilong God. Man bilong raitim song i tok, dispela Tok “i nambawan tru, na i givim gutpela save long yumi.”​—⁠Song 19:⁠8.