Lapun Pinis Tasol Em Inap Lain
MAMA i karim Kseniya long 1897. Em i gat 3-pela pikinini meri, wanpela pikinini man, 15 tumbuna pikinini, na 25 pikinini bilong ol tumbuna pikinini. Long i stap bilong em olgeta, em i mekim ol samting papamama i bin lainim em long mekim. Maski em i kam long Moscow olsem wanpela refiuji, long wanem, pait i bin bagarapim tru Ripablik Abkhaz, em i amamas long i stap bilong em, na em i amamas long bihainim lotu bilong ol tumbuna. Dispela ripablik i stap namel long solwara Black Sea na ol maunten bilong Caucasus.
Long 1993, Meri, em pikinini meri bilong Kseniya, em i kamap wanpela Witnes Bilong Jehova. Meri i kirap toktok wantaim Kseniya long God Jehova na Baibel, tasol em i no laik harim. Kseniya i wok long tokim pikinini meri bilong em olsem, “Mi lapun pinis na taim bilong mi i sot long lainim ol nupela samting.”
Tasol pikinini bilong em, Meri; na meri bilong tumbuna pikinini bilong em, Londa; na ol pikinini bilong tumbuna pikinini bilong em, Nana na Zaza, olgeta i kamap Witnes Bilong Jehova, na ol i wok long toktok wantaim em long Baibel. Wanpela apinun long 1999, ol i ritim wanpela skripsa long Kseniya na dispela i sutim tru bel bilong em. Jisas i bin mekim dispela tok bilong kirapim tingting bilong ol aposel taim em i kirapim Kaikai Bilong Bikpela. (Luk 22:19, 20) Kseniya i gat 102 krismas pinis, na long dispela apinun yet em i tok em i laik stadi long Baibel.
Kseniya i tok: “Mi bin stap laip inap 102 yia na nau mi save long as bilong i stap bilong mi. Nau mi save olsem i no gat wanpela samting i gutpela tru, winim pasin bilong lotuim gutpela God bilong yumi i gat pasin sori, em Jehova. Tingting bilong mi i klia yet na mi no gat sik. Mi inap rit na mi no yusim aiglas, na mi save bung oltaim wantaim famili bilong mi.”
Long Novemba 5, 2000, Kseniya i baptais. Em i tok: “Nau mi givim laip bilong mi long Jehova bilong mekim wok bilong em. Mi save sindaun long bas stop klostu long haus bilong mi na mi save tilim ol magasin na ol liklik nius. Ol wanblut i save raun i kam lukim mi na mi amamas long tokim ol long tok i tru bilong Jehova.”
Kseniya i wet long taim bai i kamap bihain na ‘bodi bilong em bai i kamap gutpela na strongpela gen, wankain olsem em i bin i stap long taim em i yangpela.’ (Jop 33:25) Sapos dispela meri i gat 102 krismas i pilim olsem em i lapun, tasol em inap lain long as bilong i stap bilong em long rot bilong Baibel, orait olsem wanem long yu?