“Ol i Go Daun”
“Bikpela wara i karamapim ol na ol i go daun daunbilo tru long wesan olsem ston.”
MOSES wantaim lain Israel i amamas na singim dispela song taim God i kisim bek ol long solwara Retsi na bagarapim birua bilong ol—Fero wantaim lain ami bilong em em lain Isip—i wok long bihainim ol.—Kisim Bek 15:4, 5.
Samting yumi ken lainim long dispela i klia tru sapos yumi bin lukim dispela narakain samting i kamap. I no gat wanpela man inap abrusim bagarap sapos em i tokim Jehova olsem i no stret long em i mekim wok bos o man i sakim wok bos bilong em. Tasol sampela mun bihain, ol bikman bilong lain Israel—Kora, Datan, Abiram, na 250 man i bihainim ol—long ai bilong ol man ol i soim olsem ol i no amamas long wok bos bilong Moses na Aron em wok God i bin givim long tupela.—Namba 16:1-3.
Jehova i tokim Moses long tokim lain Israel long lusim ol haus sel bilong ol dispela bikhetman. Datan na Abiram, wantaim lain famili bilong ol i bikhet na ol i no laik senisim pasin bilong ol. Moses i tokaut olsem long pasin Jehova yet i makim, Em bai soim ol manmeri olsem ol dispela man “i bin givim baksait long Bikpela.” Long dispela taim stret, Jehova i mekim na graun i bruk na op aninit long ol. “Ol i no dai yet na olgeta i go daun long ples bilong ol man i dai pinis wantaim ol samting bilong ol. Na graun i pas gen na karamapim ol.” Olsem wanem long Kora na ol narapela bikhetman? “Bikpela i salim paia i kam na i kukim dispela 250 man i mekim ofa bilong kamapim smok i gat gutpela smel.”—Namba 16:23-35; 26:10.
Fero wantaim lain ami bilong em, na ol dispela bikhetman long ples drai nating, olgeta i bagarap, long wanem, ol i no tingim wok bos bilong Jehova na pasin bilong em long tingim ol samting lain bilong em i mekim. Olsem na olgeta man i laik bai Jehova i lukautim ol long dispela taim bilong planti hevi, em i bikpela samting long ol i mas lain na bihainim tok bilong Jehova, em i “God Antap Tru” na “God I Gat Olgeta Strong.” Taim ol i mekim olsem, ol inap bilipim tru gutpela tok bilong Jehova: “Sapos 1,000 man i dai klostu long yu, na 10,000 i dai long han sut bilong yu, maski, samting nogut i no ken i kam klostu long yu. Bai yu yet i lukim God i bekim pasin nogut ol man nogut i bin mekim. Yu save go long God na hait long ol samting nogut, na God Antap Tru em i wasman tru bilong yu.”—Song 91:1, 7-9.