No Ken Larim Wanpela Man i Giamanim Yu
PASIN giaman i bin kirap long bipo yet. Wanpela bilong ol namba wan samting i bin kamap long bipo na ol i bin raitim stori bilong en, em pasin bilong giaman. Dispela samting i bin kamap taim Satan i giamanim Iv long gaden Iden.—Stat 3:13; 1 Timoti 2:14.
Kirap long dispela taim pasin giaman i bikpela tru long graun, tasol em i go bikpela moa yet long nau. Baibel i tok lukaut long ol samting bai kamap long taim bilong yumi na i tok: “Ol man nogut na ol giaman profet ol bai i wok long giamanim ol manmeri. Na Satan bai i giamanim ol yet tu, na pasin bilong ol bai i kamap nogut tru.”—2 Timoti 3:13.
I gat kain kain as na ol man i giamanim ol narapela. Ol man bilong trik na ol man bilong mekim ol promis nating i giamanim ol narapela bilong kisim mani bilong ol. Sampela man politik i giamanim lain bilong ol, ol i strong long holim namba bilong ol, maski ol i mas mekim wanem bilong mekim olsem. Ol manmeri i save giamanim ol yet. Ol i no laik tingim ol hevi inap painim ol. Ol i tokim ol yet olsem i no gat wanpela samting nogut inap kamap sapos ol i mekim ol pasin nogut olsem smok, kisim drak, o mekim pasin sem.
Na i gat pasin giaman long ol samting bilong lotu. Ol hetman bilong lotu long taim bilong Jisas i bin giamanim ol manmeri. Jisas i tok long ol dispela man bilong giaman olsem: “Ol i olsem ol aipas, na ol i laik soim rot long ol arapela. Tasol sapos aipas i soim rot long narapela aipas, orait tupela wantaim bai i pundaun long hul.” (Matyu 15:14) Na tu, ol manmeri i save giamanim ol yet long ol samting bilong lotu. Sindaun 14:12 i tok: “Sampela man i save ting, pasin bilong ol i gutpela na ol i bihainim gutpela rot. Tasol nogat. Ol i mekim i go i go, na bihain bai ol i dai.”
Olsem ol i bin mekim long taim bilong Jisas, ol i giamanim planti manmeri long ol samting bilong lotu long nau, tasol yumi no kirap nogut long dispela! Aposel Pol i tok olsem Satan “em i bin pasim tingting bilong ol dispela man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol. Olsem na ol i no save lukim Krais, em i piksa tru bilong God.”—2 Korin 4:4.
Sapos wanpela man i giaman bilong pulim mani samting bilong yumi, bai yumi tromoi nating mani bilong yumi. Sapos wanpela man politik i giamanim yumi, ating bai yumi no stap fri long mekim sampela samting. Tasol sapos Satan i giamanim yumi na yumi sakim tok i tru bilong Jisas Krais, yumi no inap kisim laip i stap gut oltaim! Olsem na yu no ken larim wanpela man i giamanim yu. Skelim gut long tingting na bel bilong yu as bilong tok i tru, em Baibel. Yu inap lus long kisim gutpela samting sapos yu no mekim olsem.—Jon 17:3.