“Yupela Save Long As na Mi Kisim Mani Bilong Yupela i Kam Bek?”
NANA em mama wanpis i gat tripela mangi, em i stap long Kaspi, long Ripablik Jojia. Em i ting olsem, “Mi mas i gat mani.” Wanpela taim dispela laik i kamap tru. Em i painim mani olsem 300 lari (K600.00) klostu long polis stesin. I no gat wanpela man i stap. Em i bikpela mani. Nana yet i no bin lukim pepa mani olsem 100 lari (K200.00) insait long faipela yia kantri bilong em i kirap mekim wok long lari olsem mani bilong ol. Ol bisnisman bilong dispela hap i no inap kisim mani olsem insait long tripela o fopela yia samting.
Nana i tingting olsem, ‘dispela mani bai helpim mi olsem wanem sapos em i mekim na mi lusim bilip, na pasin bilong pret long God na tingim ol samting bilong spirit?’ Em i bin wok strong long kisim ol pasin Kristen, na em i sanap strong long bilip maski ol man i mekim nogut long em na paitim em.
Taim em i go long polis stesin, Nana i lukim faipela ofisa bilong polis i wok strong long painim wanpela samting. Em i luksave olsem ol i wok long painim dispela mani, olsem na em i go na askim ol: “Wanpela samting bilong yupela i lus?”
Ol i tok, “Mani.”
“Hamas mani?”
“Tri handet lari!”
Nana i tok: “Mi painim mani bilong yupela.” Na bihain em i askim ol: “Yupela save long as na mi kisim mani bilong yupela i kam bek?” Ol i no save.
Em i tok, “Long wanem, mi wanpela Witnes Bilong Jehova. Sapos nogat, mi no inap kisim mani i kam bek.”
Bikman bilong ol polis i bin lusim dispela mani, em i givim Nana 20 lari (K40.00) bilong kamapim amamas bilong em long stretpela pasin Nana i mekim.
Stori bilong dispela samting i go hariap long olgeta hap bilong distrik Kaspi. Long de bihain, wanpela meri i save klinim ofis i kam ausait long polis stesin na em i tokim Nana: “[Bikman bilong ol polis] oltaim em i save putim ol buk na nius bilong yupela i stap long ofis bilong em. Ating nau em bai laikim moa yet ol dispela buk.” Wanpela ofisa bilong polis i tok: “Sapos olgeta manmeri ol i Witnes Bilong Jehova, husat bai mekim ol pasin nogut?”