Yu Ting Yu Mas Isi Tasol Long Olgeta Samting?

ATING planti manmeri bai amamas sapos ol narapela i tingim ol olsem man i save isi tasol long olgeta samting​—⁠em man bilong stap isi tasol, na stap bel isi, na isi long ol man. Tasol dispela pasin, sampela taim em i no gutpela. Baibel i tok: “Ol man i ting ol i save pinis [“ol man i isi tasol,” NW ] long olgeta samting, ol i olsem ol longlong man. Dispela tingting bilong ol bai i bagarapim ol yet.” (Sindaun 1:​32) Wanem insait bilong dispela tok?

Sampela Baibel i tanim dispela tok Hibru bilong pastaim olsem “les pasin” (American Standard Version), “hambak” (The New American Bible), “pasin bilong ting olgeta samting i gutpela tasol.” (The New English Bible) Em nau, pasin bilong isi tasol, em inap makim tu les pasin na mekim nating nating ol samting, olsem na em i wankain olsem longlong pasin o pasin kranki.

Long taim bilong ol aposel, ol Kristen long kongrigesen bilong Laodisia i no tingim ol samting bilong spirit ol i sot tru long en. Ol i hambak na tok: “Mi no sot long wanpela samting.” Jisas i stretim ol na i tokim ol long kisim bek pasin bilong wok strong na givim bel long wok Kristen.​​—⁠KTH 3:​14-​19.

Long taim bilong Noa tu, ol man i gat pasin bilong isi tasol na ol i ting olgeta samting i gutpela tasol. Ol i tingting tasol long ol samting bilong skin, “ol i wok long kaikai na dring, na ol man i maritim ol meri, . . .  Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.” Bihain Jisas i tok moa: “Orait wankain pasin tasol bai i kamap long taim Pikinini Bilong Man i kamap.”​​—⁠Matyu 24:​37-​39.

Ol tok profet bilong Baibel i kamap pinis i soim olsem yumi stap long taim “Pikinini Bilong Man i kamap,” em Jisas Krais. Yumi no ken tru ting olgeta samting i gutpela tasol, na yumi mekim nating nating tasol, na hambak​​—⁠olsem isi tasol long olgeta samting.​​—⁠Luk 21:​29-​36.