Olgeta Man i Mas Kisim Gutpela Tok Amamas
EM I wanpela gutpela de bilong wanpela liklik pikinini meri. Tru, long ol narapela taim em i mas kisim ol tok bilong stretim em, tasol long dispela de em i bihainim gutpela pasin tru. Orait, long nait mama bilong em i harim em i krai. Taim mama i go na askim em long wanem as na em i bel hevi, em i krai na i tok: “Ating mi no bin bihainim gutpela pasin long nau, a?”
Dispela askim bilong em i olsem naip i sutim stret bel bilong mama. Olgeta taim mama i save hariap long stretim em. Tasol long dispela de, maski em i luksave olsem pikinini meri i wok strong tru long bihainim gutpela pasin, mama i no tok amamas liklik long em.
I no ol liklik pikinini meri tasol i mas kisim ol kain gutpela tok amamas na ol tok bilong mekim gut bel bilong ol. Yumi tu i mas kisim ol kain tok olsem—wankain olsem yumi mas kisim ol tok bilong stiaim na stretim yumi.
Yumi save pilim olsem wanem taim wanpela i mekim gutpela tok amamas long yumi? Dispela i save strongim bel bilong yumi na mekim yumi amamas, a? Na yumi pilim olsem narapela i lukim wok yumi mekim na em i tingim yumi. Dispela i save strongim bel bilong yumi, long wanem, yumi save olsem ol samting yumi mekim i gutpela, na dispela i kirapim yumi long wok strong gen long bihain. Olsem na tok amamas narapela i mekim long yumi, planti taim dispela i save mekim na yumi pas gut wantaim em.—Sindaun 15:23.
Jisas Krais i save olsem em i mas mekim gutpela tok amamas long ol narapela. Long tok piksa bilong ol wokboi i kisim mani, bikman (em i makim Jisas yet) i mekim gutpela tok amamas long tupela wokboi wan wan, em i tok: “Yu gutpela wokboi, yu bin mekim gutpela wok tru.” Man! Em gutpela tok. Tru, save ol i gat long mekim wok na ol samting ol i kisim i narapela narapela, tasol ol i kisim wankain gutpela tok amamas.—Matyu 25:19-23.
Olsem na yumi mas tingim mama bilong dispela liklik pikinini meri. Yumi no ken wet long ol narapela i krai pastaim na bihain yumi mekim gutpela tok amamas long ol, nogat. Yumi yet i mas painim rot bilong mekim gutpela tok amamas long ol narapela. Tru tumas, i gat as na yumi mas mekim gutpela tok amamas long ol narapela taim rot i op long mekim olsem.