Ol Wok i Strongim Stretpela Pasin

Klostu long pinis bilong yia 2001, ol lain i putim yau long Redio Mosambik ol i harim wanpela toksave olsem:

“Presiden bilong Ripablik i go lukim brens-ofis bilong ol Witnes Bilong Jehova long Maputo. Em i kirapim dispela lain bilong lotu long strong moa yet long mekim wok bilong strongim stretpela pasin insait long ol famili na long skulim ol manmeri i bikpela pinis long rit rait. Inap olsem 10,000 manmeri i bin kisim helpim long dispela wok. Olsem Presiden Chissano i tok, ol man i mas amamas long ol kain wok olsem, long wanem, dispela wok i helpim gut komiuniti long stretim hevi bilong ol long planti man i no save long rit rait samting.”

Dispela toksave i kamapim sampela tok moa bilong presiden, em i tok: “Mipela i amamas tru long lukim olsem planti manmeri i gat laik long lain long rit rait. Dispela i kamapim olsem ol man nating bilong kantri yet bai wok long helpim mipela long daunim namba bilong ol lain i no save long rit rait. Olsem na mi laik kirapim ol Witnes Bilong Jehova long strong long mekim dispela wok bilong lainim ol man long rit rait, maski ol i mekim long wanem wanem tok ples. Bikpela samting em olsem, ol manmeri i mas save long rit rait na ol i no ken hatwok long toktok gut wantaim na bihain ol i ken kisim sampela skul moa.”

Ol Witnes Bilong Jehova long Mosambik i mekim skul bilong lain long rit rait long 850 ples insait long kantri bambai ol manmeri yet i ken ritim Tok Bilong God. Na tu, long olgeta wik ol Witnes i save mekim 50,000 Baibel-stadi i no gat pe. Olgeta dispela wok em hap bilong wanpela program bilong skulim ol man long Baibel, na em i stap nau long 235 kantri. (Matyu 24:14) Yu tu inap kisim helpim long dispela program. Plis askim ol Witnes Bilong Jehova long hap yu stap long en.