Gutpela Taim Tru Bilong i Stap Laip

TAIM hevi i painim yu, yu gat bikpela laik long ol samting i mas stap olsem long ‘gutpela taim bipo’? Orait, tingim tok bilong saveman King Solomon: “Yu no ken tok, ‘Olsem wanem na taim bipo i winim dispela taim nau?’ Sapos yu mekim kain tok olsem, yu no gat gutpela save.”​—⁠Saveman 7:⁠10.

Bilong wanem Solomon i tok olsem? Long wanem, em i save sapos yumi gat stretpela tingting long ol samting bilong bipo, dispela bai helpim yumi long karim ol hevi i painim yumi long nau. Ol man i save wari long ‘gutpela taim bipo,’ ating ol i lusim tingting olsem, long bipo tu i gat ol hevi i bin painim ol na ol i no stap gutpela olgeta. Sampela samting bilong bipo ating em i bin gutpela, tasol planti samting nogat. Olsem Solomon i tok, yumi no gat gutpela save sapos yumi tingting oltaim long ol samting bilong bipo, long wanem, yumi no inap senisim ol samting i go wankain olsem bipo.

Sapos yumi tingting oltaim na wari wari long gutpela taim bilong bipo, dispela inap nogutim yumi sapos yumi no laik senisim sampela samting long i stap bilong yumi long nau o sapos em i pasim yumi long tingim gut dispela taim nau yumi stap long en na long wetim gutpela samting bai kamap bihain.

Nau em gutpela taim bilong i stap laip, maski ol hevi bilong graun i go bikpela moa. Bilong wanem? Long wanem, klostu nau bai God i kamapim tru laik bilong em long dispela graun na ol blesing bai yumi kisim taim Kingdom bilong em i bosim graun na ol manmeri i stap bel isi. Baibel i tok promis olsem: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:⁠4) Em nau, ol samting bai kamap gutpela tru, olsem na i no gat as na wanpela man bai wari wari long gutpela taim bilong bipo.