“Tripela Saveman”—Ol i Husat?

Ol piksa bilong Maria i karim Jisas i save kamapim tripela man i bilas gut tru wantaim ol kamel bilong ol, ol i kamap long haus bilong ol animal we bebi Jisas i slip long bokis kaikai bilong ol bulmakau. Planti man i kolim ol dispela man i gat gutpela bilas tru olsem tripela saveman. Baibel i tok wanem long ol?

Baibel i tok, ol dispela saveman ol i kam long “hap sankamap,” na long dispela hap yet ol i bin kisim save long mama i bin karim Jisas. (Matyu 2:​1, 2, 9) Ol i mas wokabaut inap longpela taim tru bilong kamap long Judia. Taim ol i painim Jisas, em i no nupela bebi i slip long bokis kaikai bilong ol bulmakau, nogat. Ol i painim Maria na “pikinini” i stap long wanpela haus.​—⁠Matyu 2:⁠11.

Sampela Baibel i kolim ol olsem ol saveman, o ol man bilong lukluk long sta, na i no kolim namba bilong ol. Buk The Oxford Companion to the Bible i tok: “Wok bilong posin na marila na pasin bilong lukluk long sta ol i save wok wantaim, na dispela i kamap klia long samting ol dispela man i mekim bilong kisim save long sta i soim rot long ol i kam long Betlehem.” Baibel i tok klia na i tambuim olgeta kain wok posin marila na pasin bilong ol Babilon long traim long kisim tok i kam long ol sta.​​—⁠Lo 18:​10-​12; Aisaia 47:⁠13.

Tok ol dispela man i kisim i no kamapim gutpela samting. Em i kirapim king nogut, Herot, long kros na bel nogut. Dispela i as na Josep, Maria, na Jisas i ranawe i go long Isip, na tu, ol i kilim i dai olgeta pikinini man long Betlehem “i no winim tupela krismas yet.” Long ol save Herot i bin kisim long ol dispela man bilong lukluk long ol sta, em skelim gut taim bilong mama i karim Jisas. (Matyu 2:16) Taim yumi tingim olgeta hevi i kamap long dispela raun bilong ol, i stret long tok olsem sta ol i bin lukim na nius bilong Maria i karim ‘nupela king bilong ol Juda,’ ol i kam long birua bilong God, Satan, em i laik kilim Jisas i dai.​—⁠Matyu 2:​1, 2.