Ol i Tingim Ol Witnes Bilong Jehova Em Ol i Bin Kilim Ol i Dai
LONG Mas 7, 2002, long taun Körmend, long hap wes bilong Hangari, ol i kamapim wanpela hap plang i gat nem bilong tripela man long en. Em i bilong tingim indai bilong tripela Witnes Bilong Jehova ol Natsi i bin kilim ol i dai long 1945.
Ol i pasim dispela plang long banis bilong nambawan ofis bilong dipatmen bilong paia long Hunyadi Road, em hap ol i bin kilim tripela long ai bilong ol man. Dispela plang i bilong tingim “Ol Kristen em ol man i bin kilim ol i dai long Mas 1945, long wanem, ol i bin bihainim maus bilong bel na ol i no laik insait long ami. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Ol Witnes Bilong Jehova.”
Ol i kilim i dai ol dispela man tupela mun tasol paslain long Namba Tu Pait i pinis. Bilong wanem ol i kilim ol dispela Kristen i dai? Niuspepa Vas Népe bilong Hangari, i tok: “Taim Hitler i kisim pinis bikpela strong, ol Natsi i no mekim nogut long ol Juda tasol, ol i mekim nogut tru long ol Witnes Bilong Jehova tu, na putim ol long ol banis kalabus nogut na kilim ol i dai sapos ol i no lusim bilip bilong ol. . . . Long Mas 1945, wanpela taim nogut i kamap long hap wes bilong Hangari. . . . Ol i wok long salim ol Witnes Bilong Jehova i go long narapela hap na kilim ol i dai.”
Program bilong kamapim dispela plang em i gat tupela hap long en. Namba wan hap i bin kamap long Haus Bilong Batthyány. Ol man bilong mekim tok em Profesa Szabolcs Szita, nambawan bos bilong Holocaust Documentation Center long Budapest; László Donáth, memba bilong Parliament’s Committee for Human Rights, Minority and Religious Affairs; na Kálmán Komjáthy, em i bin lukim stret long ai bilong em ol i kilim i dai dispela tripela Kristen—em saveman bilong ol samting bilong dispela taun. Winim 500 handet manmeri i bin stap long namba wan hap bilong program ol i wokabaut brukim taun i go long namba tu hap bilong program—em hap we Bikman József Honfi bilong Körmend i kamapim dispela hap plang.
Long pas bilong em bilong tok gutbai, Ján Žondor (János Zsondor) i tokim ol brata sista Kristen bilong em long ol i no ken krai sori. Em i tok: “Long tingting bilong mi, mi inap tingim yet tok bilong Jon i stap long Kamapim Tok Hait 2:10: ‘Yu mas holim bilip, i go inap long taim yu dai.’ . . . Tokim famili bilong mi, ol pren, na ol brata sista long kongrigesen, ol i no ken krai sori, long wanem, mi no dai olsem wanpela man nogut, nogat; mi dai bilong holimpas tok i tru.”
[Piksa long pes 32]
Bertalan Szabó
[Piksa long pes 32]
Antal Hőnisch
[Piksa long pes 32]
Ján Žondor