“Mi No Bin Save Gut Long God”

WANPELA man i save sindaun long Kerala, India, em i raitim pas na i tok olsem: “Inap wanpela yia nau ol Witnes Bilong Jehova i wok long kam lukim mi na ol i autim gutpela tok bilong Kingdom bilong God. Inap etpela yia mi bin stap wanpela Katolik, tasol mi no bin save gut long God. Insait long dispela wanpela yia mi bin lainim planti samting.” Na em i tok moa: “Mi amamas tru long save olsem yupela i save wokim nius Wastaua long 139 [nau 146] tok ples. Mi kirap nogut olsem ol manmeri bilong narapela narapela tok ples ol i wok long kisim save long God.”

Maski ol saveman i tok yumi no inap save long God, aposel Pol i tokaut klia olsem yumi inap long kisim save long God. Em i givim tok long sampela man bilong Atens, em sampela bilong ol i save lotu long wanpela alta ol i wokim bilong wanpela ‘god ol i no save long en,’ na Pol i tok: “Dispela God yupela i no save long en na yupela i lotu nating long en, nau mi laik autim tok bilong en long yupela. ‘God i bin wokim skai na graun wantaim olgeta samting i stap long en . . . Em yet i save givim laip na win na olgeta samting long olgeta manmeri. Long wanpela tumbuna tasol em i bin mekim olgeta lain manmeri i kamap. Na em i putim ol i stap long olgeta hap bilong graun.’ ”​—⁠Aposel 17:​23-26.

Pol i kirapim ol man i harim tok bilong em long kisim save long Man bilong wokim olgeta samting, long wanem, “em i no i stap longwe long yumi olgeta wan wan.” (Aposel 17:27) Ol Witnes Bilong Jehova bai amamas long helpim yu long kisim save long dispela trupela God na ol gutpela pasin bilong em.