“Mi Painim Pinis Olgeta Samting Mi Sot Long En”
WANPELA ripot bilong lain Wol Helt Oganaisesen i tok, long nau winim 120 milion manmeri long olgeta hap bilong graun ol i kisim nogut long sik bilong bel hevi. Long olgeta yia, wan milion manmeri i kilim i dai skin bilong ol yet, na namel long 10 na 20 milion manmeri i traim long kilim i dai ol yet. I gat wanem helpim long ol manmeri em bel hevi i wok long bagarapim ol? Ating marasin inap helpim ol long daunim bel hevi bilong ol, na pasin bilong mekim gut bel bilong ol i bikpela samting. Na tu, sampela em ol i karim dispela hevi ol i kisim sampela helpim moa long rot bilong ol buk na nius bilong Baibel em ol Witnes Bilong Jehova i wokim, olsem wanpela pas bilong Frans i kamapim. Pas i tok:
“I no longtaim i go pinis na mi ting olsem i no gat as na mi mas i stap laip yet. Mi beten long God long em i ken larim mi i dai. Long bel i olsem mi dai pinis. Mi wok long painim rot, olsem na mi beten strong long Jehova. Na tu, mi ritim yiabuk bilong ol Witnes Bilong Jehova bilong 2002 na mi pinisim buk insait long tripela de. Mi ken tok olsem dispela buk i bin helpim mi tru na i strongim bilip bilong mi.
“Mi painim painim sampela save moa long ol Wastaua na Kirap!, na mi kirap nogut stret! Mi bin ritim ol dispela nius long olgeta mun insait long 15 yia pinis, tasol mi no bin luksave olsem ol stori bilong en inap strongim tru bel bilong man. Ol i kamapim tru pasin sori—em wanpela pasin yumi lukim wan wan taim tasol long nau. Mi painim pinis olgeta samting mi sot long en.”
Baibel i tok: “God i save stap klostu long ol manmeri i gat hevi. Na em i save helpim ol manmeri bilip [“bel,” NW ] bilong ol i bagarap.” (Song 34:18) Yumi save, Baibel inap strongim bel bilong olgeta man “i gat hevi” o “bel bilong ol i bagarap,” na ol inap wetim gutpela samting bai kamap bihain. Ol Witnes Bilong Jehova i save tilim ol buk na nius bilong Baibel bilong helpim ol man i sot long ol gutpela tok bambai ol i ken kisim helpim long ol tok bilong Baibel i save mekim gut bel bilong man.