Mipela i Amamas Long Singautim Yu

LASPELA KAIKAI, em Bikpela Jisas Krais i bin kamapim inap 2,000 yia i go pinis, em i no wanpela samting bilong bipo tasol, nogat. Stat long dispela taim, dispela kaikai i bin kirapim tru ol manmeri. Planti manmeri i pilim tru stori bilong fopela Gutnius long ol samting i bin kamap long nait bilong Laspela Kaikai, olsem na ol i wok strong long mekim Kaikai Bilong Bikpela long kain kain rot.

Yumi inap save long as na ol man i mekim olsem, long wanem, Jisas Krais yet i bin tokim ol disaipel bilong em long mekim dispela kaikai long olgeta taim. Em i tokim ol olsem: “Yupela i mas mekim olsem bilong tingim mi.”​—⁠Luk 22:19; 1 Korin 11:​23-25.

Bilong dispela bung i ken helpim tru man, em i mas i gat stretpela save long ol samting em dispela bung i makim, olsem Baibel i kamapim. Na tu, em i bikpela samting long man i mas save long Baibel i makim wanem de, taim, na pasin bilong mekim dispela bung.

Bilong bihainim tok bilong Jisas, ol Witnes Bilong Jehova long olgeta hap bilong graun, ol bai bung wantaim long apinun long Trinde, Epril 16, 2003, long tingim i dai bilong Jisas. Long dispela bung ol bai skelim ol tok bilong Baibel na strongim bilip bilong ol long Bikpela Jisas Krais, na pasin bilong ol long laikim em. Jisas yet i bin tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” ( Jon 3:16) Mipela i amamas long singautim yu long bung wantaim ol long dispela apinun na bai yu tu i ken strongim bilip bilong yu long Jisas Krais na Papa long heven em Jehova God, na laikim tru tupela.