Samting Bilong Mekim Gut Bel Bilong Ol Man i Krai Long Kisim Helpim
BAIBEL i no buk bilong stretim sik bilong tingting. Tasol em i gat ol tok bilong mekim gut bel bilong yumi na i helpim yumi long tingim laip i gutpela samting maski planti hevi i save painim yumi. Yumi save, Baibel i tok olsem: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:1) Yumi no gutpela olgeta, olsem na dispela i as na sampela hevi i painim yumi. Tasol husat i as tru bilong ol hevi i painim yumi?
Baibel i kolim dispela man olsem wanpela bikhet spirit nem bilong em Satan. Em i “man bilong giamanim olgeta manmeri bilong graun” na em i kamapim planti hevi long ol manmeri. Tasol Baibel i tokim yumi olsem taim bilong em i sot pinis. (KTH 12:9, 12) Klostu nau God bai pinisim olgeta hevi Satan i bin putim long olgeta manmeri bilong graun. Olsem Baibel i tok, God i promis long kamapim nupela taim i gat stretpela pasin, na em bai pinisim bel hevi.—2 Pita 3:13.
Tru tumas, bel bilong yumi i stap isi taim yumi save olsem ol hevi i save painim ol manmeri i bilong sotpela taim! Taim Kingdom Bilong God long heven long han bilong Jisas Krais i bosim dispela graun, pasin bilong mekim nogut long narapela na ol hevi bai pinis. Baibel i tok long King God i makim olsem: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”—Song 72:12-14.
Taim bilong truim bilong dispela tok profet i kam klostu nau. Yumi inap kisim laip oltaim long Paradais long graun taim olgeta samting i kamap gutpela. (Luk 23:43; Jon 17:3) Ol dispela gutpela tok promis long Baibel i helpim na i mekim gut bel bilong ol man i krai i stap long kisim helpim, long wetim gutpela samting i kamap.
[Piksa Kredit Lain long pes 32]
Depressed girl: Photo ILO/J. Maillard