Lotu i Tru i Helpim Famili Long Pas Gut Wantaim

MARIA i gat 13 krismas taim em na liklik susa bilong em Lucy i harim stori bilong Jehova long wanpela wanblut bilong ol. Em i bin stori tu long ol long Paradais bai kamap long graun. Dispela i bin kirapim tingting bilong tupela, na tupela i go wantaim em long Haus Kingdom bilong ol Witnes Bilong Jehova. Long dispela hap, Maria i amamas long harim ol i kamapim gut ol tok. Em i narakain tru long sios bilong ol we ol i save mekim planti singsing na no gat planti tok ol i harim! Bihain liklik, Maria na Lucy i stadi long Baibel wantaim wanpela Witnes Bilong Jehova.

Bikpela brata bilong ol, Hugo, i laikim bikpela save bilong ol man bilong dispela graun na evolusen. Em i tingim em yet olsem wanpela man i no bilip long God. Tasol taim em i stap long skul bilong wok ami, em i ritim buk Life​​—⁠How Did It Get Here? By Evolution or by Creation? a Em i painim bekim bilong ol askim em ol narapela lotu i no inap bekim. Taim em i pinisim skul bilong em long wok ami, em i kirap strongim nupela bilip bilong em long God long rot bilong stadi long Baibel na go long ol miting wantaim ol susa bilong em. Maria na Lucy i bin kisim baptais long 1992, em olsem 2-pela yia bihain long taim tupela i bin harim tok i tru bilong Baibel, na brata bilong tupela i kisim baptais 2-pela yia bihain.

Long dispela taim, papamama bilong ol i givim bel tru long lotu Katolik na ol i no amamas tumas long harim tok i tru bilong Baibel. Ol i tingim ol Witnes Bilong Jehova olsem ol lain bilong skrapim bel bilong ol narapela, tasol ol i save laikim gutpela pasin na bilas bilong ol yangpela Witnes em ol pikinini bilong ol i save singautim i kam long haus bilong ol. Na tu, long taim bilong kaikai ol pikinini bilong ol i toktok long ol samting ol i bin lainim long miting na dispela i kirapim tingting bilong papamama na ol i laik save.

Tasol papamama i laikim pasin bilong wokim marila. Papa em i wanpela man bilong dring spak na i save paitim mama. Famili bilong ol i laik bruk. Bihain papa i stap 2-pela wik long kalabus long pasin i no stret em i mekim long taim em i dring spak. Taim em i stap long kalabus, em i kirap long ritim Baibel. Taim em i wok long ritim, em i lukim tok bilong Jisas i stori long mak bilong las de. Dispela i kamapim planti askim long tingting bilong papa na mama, olsem na tupela i go long Haus Kingdom na ol i orait long stadi long Baibel. Taim ol i kisim save long tok i tru, ol i rausim ol buk i stori long wok marila, na ol spirit nogut i no moa mekim nogut long ol, long wanem, ol i singaut long nem bilong Jehova. Ol i kirap long senisim pasin bilong ol.

Man! Tingim bikpela amamas Maria na Lucy i kisim taim ol i lukim papamama bilong ol i kisim baptais na Hugo i baptaisim ol long wanpela bilong ol kibung distrik i kamap long Bolivia long 1999. Dispela samting i bin kamap 9-pela yia bihain long taim Maria na Lucy i bin harim stori bilong Jehova na ol tok promis bilong em. Long nau, Maria, Lucy, na Hugo i mekim wok autim tok fultaim. Ol i amamas tru olsem lotu i tru i bin helpim famili bilong ol long pas gut wantaim!

[Futnot]