Em i Laikim Pasin Bilong Mekim Gut Long Narapela

MILTON G. HENSCHEL, i stap memba bilong Gavening Bodi bilong ol Witnes Bilong Jehova inap longtaim tru, em i pinisim wok bilong em long graun long Sarere, Mas 22, 2003. Em i gat 82 krismas.

Taim em i yangpela yet, Milton Henschel i kirap wok wantaim lain long nambawan ofis bilong ol Witnes Bilong Jehova na em i stap gut long wok winim 60 krismas. Wantu ol i luksave long gutpela pasin bilong em long tingting gut na skelim samting, na bikpela laik bilong em long helpim wok autim tok bilong Kingdom. Long 1939 em i kamap kuskus bilong N. H. Knorr, long dispela taim Brata Knorr i stap wasman bilong prinim ol buk bilong ol Witnes Bilong Jehova long Brooklyn. Long 1942, taim Brata Knorr i kirap lukautim wok bilong ol Witnes Bilong Jehova long olgeta hap, em i larim Brata Henschel i stap helpim bilong em. Brata Henschel i maritim Lucille Bennett long 1956, tupela i amamas wantaim na karim hevi wantaim long i stap bilong ol.

Brata Henschel i wok gut wantaim Brata Knorr inap long indai bilong Brata Knorr long 1977. Planti taim Brata Henschel i stap wantaim Brata Knorr, em i raun long 150 kantri, lukim na strongim ol Witnes Bilong Jehova long olgeta hap bilong graun, moa yet em ol misineri na ol lain bilong ol brens-ofis. Raun ol i mekim, sampela taim em hatwok na skin bilong ol i les, na tu, ol inap kisim bagarap. Long 1963, taim Brata Henschel i go long wanpela kibung long Laiberia, em i kisim hevi long pasin birua nogut tru ol i mekim long em i no insait long pasin bilong litimapim kantri.a Dispela samting i no pasim Brata Henschel long go bek long Laiberia sampela mun tasol bihain bilong bungim presiden na toktok wantaim em long larim ol Witnes Bilong Jehova i stap fri moa long mekim lotu.

Long stretim ol bikpela hevi na ol hevi i hatwok long karim, Brata Henschel i gat nem long mekim gutpela pasin, redi long senisim tingting, na tingim na skelim gut samting. Ol wanwok bilong em i laikim tru pasin bilong em long stretim gut ol samting, daunim em yet, na pasin bilong amamas na lap. Em i save amamasim planti misineri long olgeta hap taim em i tingim na kolim kwik nem bilong ol, kolim wanpela o tupela hap tok ples bilong ol dispela hap, na mekim kain kain tok pilai.

Maika 6:8 (NW ) i tok God Jehova i laik bai yumi “laikim pasin bilong mekim gut long narapela.” Milton Henschel i stap gutpela piksa long dispela pasin. Maski em i gat bikpela wok, em stap olsem man ol narapela i no pret long go toktok wantaim em, mekim pasin isi, na mekim gutpela pasin. Em i save tok: “Taim yu gat tupela tingting long yu bai mekim wanem, yu mas tingim, pasin bilong mekim gut long narapela em i stretpela samting long mekim.” Yumi sori long dispela gutpela brata i lusim yumi, tasol yumi amamas long em i stap gut i go inap long em i dai, yumi save em i kisim dispela gutpela samting, “laip olsem prais.”​—⁠KTH 2:⁠10.

[Futnot]

[Piksa long pes 31]

M. G. Henschel wantaim N. H. Knorr

[Piksa long pes 31]

Wantaim meri bilong em, Lucille