Taim Ol Tok Promis Bai Kamap Tru
I KAM inap nau, i gat planti stori long ol man i no truim ol tok promis bilong ol. Planti taim ol kantri i no bihainim ol tok promis ol i bin sainim bilong i stap wanbel wantaim ol narapela kantri, na ol i kirapim ol manmeri bilong ol long go insait long ol pait nogut tru. Napoleon i bin tok: “Ol gavman i save bihainim ol tok promis bilong ol taim ol man i subim ol strong long mekim olsem o taim ol bai kisim ol gutpela samting long en.”
Na olsem wanem long ol tok promis ol wan wan man i mekim? Yumi bel hevi taim wanpela man i no truim ol tok promis bilong em, a? Na yumi bel hevi moa sapos em man yumi save long em na trastim em. Tru, ating ol manmeri i no inap o ol i no laik truim tok promis bilong ol.
Man! Pasin bilong ol man long mekim tok promis i narapela kain long pasin bilong God long mekim tok promis! Ol tok promis bilong God i tru na yumi inap bilip tru long en. Wanem wanem tok promis God Jehova i mekim—ol bai kamap tru. Yumi save tru, em bai truim ol tok promis bilong em. Aisaia 55:11 i stori long tok bilong Jehova i save kamap tru na i tok: “Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”
Olsem na yumi mas i gat wanem tingting long ol tok promis bilong God long Baibel? Yumi ken bilip tru long ol. Olsem: Aposel Jon i tok: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Yu ken kisim kain blesing olsem sapos yu bihainim tok bilong Jisas. Em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”—Jon 17:3.