“Yupela i No Ken Pas Wantaim Ol”
OLSEM yu ken lukim long piksa, kamel ol i pasim wantaim bulmakau bilong brukim graun, ol i no inap wok gut. Plang i pasim tupela wantaim—em bilong pasim tupela animal i gat wankain sais na strong—i mekim na tupela animal wantaim i kisim hevi. God i tingim ol dispela kain animal, na em i tokim ol Israel: “Yupela i no ken pasim bulmakau wantaim donki long hap ain bilong brukim graun na mekim tupela i wok wantaim long brukim graun long gaden.” (Lo 22:10) Dispela stiatok i stret tu long bulmakau na donki.
Fama i no save putim bikpela hatwok tumas long ol animal bilong em. Tasol sapos em i no gat tupela bulmakau, em i ken pasim tupela wankain animal. Ating dispela fama bilong yia 1800 samting long piksa em i laik mekim dispela pasin. Sais na hevi bilong tupela animal i no wankain, olsem na animal i no strong em i mas taitim bun tru bilong em inap wokabaut wantaim narapela animal, na animal i gat strong em i mas karim bikpela hevi moa.
Aposel Pol i mekim wok long dispela tok piksa bilong skulim yumi long wanpela bikpela samting. Em i tok: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak?” (2 Korin 6:14) Olsem wanem wanpela Kristen inap pas wantaim man i no bilip?
Wanpela rot i olsem, sapos wanpela Kristen i kisim poroman marit i no gat wankain bilip olsem em. Kain marit olsem bai i hatwok long tupela wantaim, long wanem, tupela i no inap wanbel long ol bikpela samting.
Taim Jehova i wokim namba wan marit, em i givim wok long meri long stap olsem “helpim.” (Stat 2:18) Na tu, long rot bilong profet Malakai, God i kolim meri olsem “poroman.” (Malakai 2:14) Man bilong wokim yumi i laik bai tupela marit i mas wok gut wantaim long ol samting bilong spirit, karim ol hevi wantaim na kisim ol wankain gutpela samting.
Taim Kristen i “maritim man i bilip long Bikpela,” em i soim olsem em i daun long tok bilong Papa bilong yumi long heven. (1 Korin 7:39) Dispela i as bilong marit i pas gut wantaim, na taim tupela i stap “wanwok tru” long wankain gutpela tingting dispela i litimapim na givim biknem long God.—Filipai 4:3.
[Piksa Kredit Lain long pes 32]
Camel and ox: From the book La Tierra Santa, Volume 1, 1830