Wanpela Taim Bai Kamap we i No Gat Pasin Raskol

SAPOS yu inap, tingim wanpela taim we i no gat ol raskol! I no gat wok long polis, ol haus kalabus, o wok bilong tromoi bikpela mani long ol kot. Em i wanpela taim we ol man wan wan bai rispektim laip na ol samting bilong ol narapela. Yu ting dispela samting bai i no kamap tru? Ating yu bai ting olsem, tasol Baibel i tok promis long dispela bikpela senis long ol samting bai kamap gutpela. I gutpela sapos yu skelim ol tok profet Baibel i mekim long pasin raskol na ol narapela pasin nogut long dispela graun.

Long Buk Song, Baibel i tok: “Yu no ken wari long pasin ol man nogut i save mekim. Yu no ken bel nogut long ol samting bilong ol man i save mekim pasin nogut. Liklik taim tasol na bai ol man nogut i bagarap, olsem gras i save drai, na olsem lip bilong diwai i drai. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:​1, 2, 11) I no gat wanpela man inap pasim God long truim dispela tok promis na ol narapela gutpela tok promis em i mekim.

God bai kamapim ol dispela blesing long rot bilong Kingdom bilong em. Long Beten Bilong Bikpela, Jisas Krais i bin lainim ol disaipel bilong em long beten long dispela Kingdom i mas i kam na laik bilong God i mas kamap “long graun olsem em i save kamap long heven.” (Matyu 6:​9, 10, King Jems Nupela Testamen) Klostu nau aninit long dispela Kingdom, pasin bilong i stap rabis, pasin bilong mekim nogut long narapela o pasin bilong tingim em yet, i no inap kirapim wanpela man long mekim pasin raskol. Tok Bilong God i tok: “Planti rais na wit samting i ken kamap long ol gaden bilong ol manmeri.” (Song 72:16) Tru tumas, God Jehova bai givim planti gutpela samting long olgeta man i stap long graun na bai i no gat pinis bilong en. Na bikpela samting moa, ol man bai laikim tru God na ol narapela, olsem na pasin raskol bai i no inap bagarapim sindaun bilong ol man.