Ol Tang Em Ol i No Save Holim Wara

LONG taim bilong ol man i bin raitim Baibel, tang em ol man i putim insait long graun ol i mekim bikpela wok long en bilong holim wara. Long sampela taim, long Graun Bilong Promis, ol dispela tang tasol i save saplaim wara long man.

Taim profet Jeremaia i raitim toksave bilong God, em i mekim tok piksa long tang, em tok: “Ol manmeri bilong mi i bin mekim tupela rong. Ol i givim baksait long mi. Mi olsem hul wara i gat wara bilong givim laip long ol, tasol ol i lusim mi. Na tu, ol yet i wokim ol tang bilong holim wara. Na ol dispela tang i bruk nabaut na wara i no inap i stap long ol.”​—⁠Jeremaia 2:⁠13.

Ol Israel i lusim God bilong ol, Jehova​—⁠“hul wara i gat wara bilong givim laip”​—⁠ol i bilip long ol ami bilong ol lain haiden i no gat strong na ol i go lotu long ol god giaman i no inap helpim ol. Ol dispela lain ol i olsem ples hait ol Israel i bilip long ol, ol i kamap olsem ol tang i bruk nabaut na i no inap lukautim ol na i no gat strong long helpim ol, olsem Jeremaia i tok piksa long ol.​—⁠Lo 28:⁠20.

Olsem wanem? Yumi inap lainim wanpela samting long dispela stori bilong bipo? Olsem long taim bilong Jeremaia, God i stap oltaim oltaim, Jehova, em i stap yet olsem As bilong wara bilong givim laip. (Song 36:9; KTH 4:11) Long rot bilong Pikinini bilong em, Jisas Krais, God wanpela tasol bai givim laip i stap gut oltaim long ol man. (Jon 4:14; 17:⁠3) Tasol, olsem ol man long taim bilong Jeremaia, planti planti man long nau i sakim tok bilong God, na tu, ol i ting tok bilong Baibel i no gat strong. Ol i bilip long ol gavman politik bai stretim ol hevi, na long ol kain kain tok bilong ol man i no gat as bilong en, na long ol tingting bilong ol man i save sakim tok bilong God, na long ol saveman bilong graun. (1 Korin 3:​18-20; Kolosi 2:⁠8) Em i no hatwok long makim man yu ken bilip long em. Bai yu bilip long husat? Bai yu bilip long “hul wara i gat wara bilong givim laip,” Jehova, o bai yu bilip long “ol dispela tang i bruk nabaut na wara i no inap i stap long ol”?

[Piksa long pes 32]

Piksa bilong wanpela god meri ol i bin wokim long graun, em ol i painim long wanpela ples matmat long Israel

[Kredit Lain]

Photograph taken by courtesy of the British Museum