Ol Wokboi Bilong God i Olsem Ol Diwai Long Wanem Ol Rot?
MAN bilong raitim song i tok long wanpela man i amamas long ol stiatok bilong Baibel na i bihainim long i stap bilong em olsem: “Dispela man i olsem diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai. Olgeta samting em i mekim i save kamap gutpela.” (Song 1:1-3) Bilong wanem dispela tok piksa i stret?
Ol diwai inap i stap longpela taim tru. Olsem: Ol man i tok sampela diwai oliv long hap bilong Mediterenian i stap pinis inap wan tausen o tu tausen yia. Na tu, ol diwai baobab long sentral Afrika i go olpela tru, na ol man i tok wanpela diwai pain long California i gat 4,600 yia. Long bikbus, ol bikpela diwai i save helpim gut ol samting i stap klostu. Olsem: Ol longpela diwai i save helpim ol liklik diwai na ol i ken hait long san, na ol lip i pundaun long graun i givim gutpela gris long graun.
Ol nambawan longpela diwai long dispela graun ol i wok long go bikpela wantaim long bikbus, we narapela diwai i save helpim narapela diwai. Sampela diwai i stap klostu na ol rop i save pas strong wantaim, na long dispela rot ol inap sakim gut strongpela win, winim diwai i stap wanpis long hap i gat gras. Taim diwai i gat planti rop ol inap pulim planti wara na kaikai long graun. Sampela taim ol rop i go daun tru long graun, winim longpela bilong diwai, o ol rop i go longwe, winim mak bilong ol han bilong diwai.
Aposel Pol i tingim wanpela diwai taim em i tok ol Kristen i mas ‘wokabaut wantaim Krais, na sanap strong long graun, na bilip strong.’ (Kolosi 2:6, 7) Tru tumas, ol Kristen inap sanap strong sapos ol i pas strong long Krais, olsem wanpela diwai i gat ol strongpela rop i pas strong long graun.—1 Pita 2:21.
Long wanem ol narapela rot ol wokboi bilong God i olsem ol diwai? Olsem ol diwai long wanpela gaden i save kisim helpim long ol narapela diwai i stap klostu, olsem tasol ol manmeri i stap klostu long kongrigesen Kristen i kisim helpim long ol wanbilip. (Galesia 6:2) Ol gutpela strongpela Kristen, ol i gat ol rop bilong spirit i go daun tru, ol i helpim ol nupela bilipman long stap strong long bilip, maski ol man i birua nogut tru long ol. (Rom 1:11, 12) Ol nupela Kristen i ken kamap strong aninit long lukaut bilong ol strongpela wokboi bilong God. (Rom 15:1) Na olgeta manmeri insait long kongrigesen Kristen i stap long olgeta hap bilong graun ol i ken kisim helpim long ol gutpela kaikai bilong spirit long rot bilong ol ‘diwai i sanap strong,’ em ol Kristen God i bin makim long holi spirit.—Aisaia 61:3.
Yumi amamas tru long olgeta wokboi bilong God inap lukim truim bilong tok promis long Aisaia 65:22, i tok: “Ol manmeri bilong mi bai i stap longpela taim tru, olsem ol strongpela diwai.”
[Piksa Kredit Lain long pes 28]
Godo-Foto