Yu Ting Bilip Inap Oraitim Ol Sikman?

TAIM yumi sik, yumi save painim rot bilong stretim sik na kamap orait gen. Ating yu save Baibel i stori olsem planti taim Jisas Krais i bin oraitim kain kain sik, na em i bin helpim planti sikman. Olsem wanem em i bin oraitim ol sikman? Baibel i tok, long “strong bilong God.” (Luk 9:​42, 43; Aposel 19:​11, 12) Olsem na holi spirit bilong God i mekim na ol sikman i kamap orait gen, i no long bilip bilong ol sikman tasol. (Aposel 28:​7-9) Dispela em i as na Jisas i no tokim ol sikman long ol i mas tokaut long bilip bilong ol long em na bai em i oraitim ol.

Ating yu laik save: ‘Ol mirakel bilong oraitim sikman i samting bilong bipo tasol, o pasin bilong oraitim sikman olsem Jisas i bin mekim bai kamap gen? Ol man i gat bikpela sik ol inap wetim wanem gutpela samting i kamap?’

Baibel i tok long nupela stretpela taim God bai kamapim, strong bilong God bai wokim gen ol mirakel bilong oraitim ol sikman olsem Jisas i bin mekim long taim em i bin stap long graun. Ol Witnes Bilong Jehova long hap bilong yu ol bai amamas long soim yu olsem wanem God bai pinisim olgeta sik, na indai tu, na long wanem taim em bai mekim dispela​—⁠em wanpela samting ol man i tok ol inap long oraitim sik long rot bilong bilip ol i no inap mekim. Yes, God “bai i pinisim dai tru.”​​—⁠Aisaia 25:⁠8.