Yu Ting Ol i Mekim Laik Bilong God?

“Mipela i mas bihainim laik bilong yu long graun olsem ol i save bihainim long heven.”—Matyu 6:⁠10.

JULIO na Christina i lukim samting nogut tru​—⁠paia i kukim 4-pela pikinini bilong ol na ol i dai. Wanpela draiva i spak i bamim ka bilong ol i sanap i stap, na ka i pairap bikpela na i paia olgeta. Namba 5 pikinini, Marcos, ol i kisim em bek long paia, tasol paia i kukim skin bilong em na skin i kamap nogut na i stap olsem. Em i gat 9-pela krismas. Bel bilong papa i bagarap stret. Bilong mekim gut bel bilong em yet na famili, em i tok: “Yumi mas save, dispela em i laik bilong God, maski em i gutpela samting o samting nogut.”

Long kain taim nogut olsem, planti man i save mekim wankain tok. Ol i tok: ‘Sapos God i gat olgeta strong na em i save tingim yumi, orait samting i kamap em i bilong helpim yumi long wanpela rot, maski yumi hatwok long ting olsem.’ Yu wanbel long tok bilong ol?

Dispela tingting olsem maski wanem samting i kamap, gutpela samting o samting nogut, dispela i kamapim laik bilong God, planti man i kisim dispela tingting long tok bilong Jisas long beten ol i kolim Beten Bilong Bikpela, em i stap antap. I tru ol i mekim laik bilong God long heven, a? Orait taim yumi beten olsem “Mipela i mas bihainim laik bilong yu long graun,” yumi wanbel long tok olsem, wanem wanem samting i kamap long graun, em i laik bilong God?

Planti man i no wanbel long dispela tingting. Ol i ting dispela i makim olsem God i no save pilim ol hevi bilong ol man. Ol i tok: ‘Olsem wanem God bilong pasin laikim em i laik bai ol samting nogut tru i painim ol man i no gat asua? Sapos em i laik skulim yumi long dispela rot, ating em i laik skulim yumi long wanem samting?’ Ating yu gat dispela kain tingting, a?

Brata bilong Jisas, em disaipel Jems, em i tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” (Jems 1:13) God i no as bilong ol samting nogut. Olsem na yumi save, i no olgeta samting i kamap long graun em i laik bilong God, nogat. Baibel i toktok tu long laik bilong ol man, na laik bilong ol lain man, na laik bilong Satan tu. (Jon 1:13; 2 Timoti 2:26; 1 Pita 4:⁠3) Olsem wanem? Yu wanbel long tok, samting i bin painim ol pikinini bilong Julio na Christina, em i no laik bilong Papa long heven i gat pasin laikim?

Orait Jisas i laik tok wanem taim em i skulim ol disaipel long beten: “Mipela i mas bihainim laik bilong yu”? Jisas i laik askim God long pasim rot bilong sampela samting na ol i no ken kamap, o em i skulim yumi long beten long samting i bikpela moa na i gutpela moa, em wanpela senis yumi olgeta i ken wet long en? Orait yumi ken skelim sampela tok moa bilong Baibel long dispela samting.

[Ol Piksa Kredit Lain long pes 3]

Car: Dominique Faget-STF/AFP/Getty Images; child: FAO photo/B. Imevbore