Baibel i Helpim Em Long Sakim Traim

Long nau i gat planti traim. Pasin bilong bihainim ol lo bilong Baibel i no isi. Ating i hatwok long bihainim dispela tok: “Stap longwe long pasin pamuk.”​​—⁠1 Korin 6:​18.

Wanpela Witnes Bilong Jehova, em yumi ken kolim Sebastian, em i bin wok long wanpela kampani bilong Skandinevia long Polan. Em i mas wok strong bambai em inap holimpas bilip.

Ol wanwok bilong Sebastian i save em wanpela Witnes Bilong Jehova. Ol supavaisa i save em man bilong wok na i gat stretpela pasin, olsem na ol i praisim em long sampela gutpela wok. Tasol bihain em i kisim save olsem insait long ol dispela gutpela wok, i gat ol bisnis miting i gat ol amamas nogut insait long en.

I no longtaim na Sebastian i kisim tupela tingting. “Supavaisa i save mi wanpela Witnes Bilong Jehova. Long dispela as em i trastim mi na i lukluk long mi bilong helpim em. Sapos mi no insait long ol dispela amamas, ol bai rausim mi long dispela wok mi bin hatwok long painim. Bai i olsem wanem sapos mi sindaun lukluk tasol?”

Bihain Sebastian i kisim sampela save moa long samting supavaisa i laik bai em i mas mekim. Em i mas stretim rot bilong ol pamukmeri i ken raun wantaim ol kastama i bin kam long ol narapela kantri. Em bai mekim wanem?

Sebastian i kirapim supavaisa long tingim gen bilip bilong em long pasin pamuk em tok bilong Baibel i as bilong en. Liklik taim ol samting i kamapim klia olsem Sebastian i no fit long dispela wok na em i mas lusim. Em i painim wanpela nupela wok. Dispela wok i no givim bikpela pe long em olsem narapela wok i bin mekim, tasol i no gat ol dispela kain samting bilong traim bilip bilong em. Nau bel bilong em i no gat tok.

Sapos narapela i strong long yu mas insait long pasin pamuk o orait long en, bai yu mekim wanem? Bai yu redi long mekim bikpela senis? Em samting Josep bilong bipo i bin mekim, em Stat 39:​7-​12 i stori long en.