Rot Bilong i Stap Longtaim na i Stap Amamas
SAMPELA manmeri i tok olsem olgeta man i gat laik long stap laip, tasol i no gat wanpela i laik go lapun. Planti manmeri em krismas bilong ol i wok long go long mak bilong ritaia long wok, ol i wet long ol bai i gat bikpela haptaim moa na ol i no ken mekim planti wok. Tasol ol i pret olsem i stap bilong ol bai i no gat as bilong en na bai ol i stap olsem samting nating. Ol i pret tu long i stap wanpis, na i no inap i stap amamas, na ol i kisim sik bilong lapun samting.
Orait, wanem rot bilong i stap amamas? Ol gutpela pren na famili i gat pasin laikim ol i helpim long bringim amamas long ol yangpela na lapun wantaim. Tasol samting ol arapela inap mekim long helpim wanpela lapun, dispela i no nambawan bikpela samting. Bikpela samting moa em samting lapun yet i ken mekim bilong helpim ol narapela.
Ol i bin skelim 423 lapun marit inap longpela taim na ripot i kamapim olsem “pasin bilong mekim ol samting bilong helpim ol narapela inap helpim long surikim laip bilong yumi i go longpela.” Stephanie Brown, em i bin skelim dispela samting i tok: “Dispela ol samting i kamapim olsem i no ol samting yumi kisim long pasin pren bilong yumi wantaim ol narapela i helpim yumi, samting i helpim yumi em ol samting yumi mekim bilong helpim ol narapela.” Dispela kain pasin bilong givim inap makim pasin bilong helpim ol arapela long wok bilong haus, lukautim ol pikinini, go long stua samting, kisim ol arapela long ka, o putim yau long man husat i laik toktok.
Inap olsem 2,000 yia i go pinis, Jisas Krais i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Rot bilong i stap longpela taim na i stap amamas i no kam long rot bilong i gat bikpela mani long beng o long kisim ol marasin samting bilong skruim laip i go longpela na kisim gutpela kaikai. Nogat. Em i kam long pasin bilong mekim wok na givim taim na strong bilong yumi long helpim ol narapela.
Tasol ol dispela samting i no inap pasim yumi long i go lapun, kisim sik, na i dai. Kingdom Bilong God tasol bai pinisim ol dispela samting. Taim Kingdom i bosim graun, bai i no gat sik na “dai.” (KTH 21:3, 4; Aisaia 33:24) Na tu, ol manmeri i save bihainim tok ol bai i stap oltaim na i stap amamas long graun i kamap Paradais. (Luk 23:43) Ol Witnes Bilong Jehova i amamas long helpim ol narapela long save long tok bilong Baibel i stori long rot bilong i stap longtaim na i stap amamas.