Sakim Pasin Nogut—Dispela Tasol Inap?
“SAMTING yu no laik ol i mekim long yu, yu no ken mekim long ol narapela.” Dispela tok i bilong Konfusas, em wanpela tisa na saveman bilong Saina i gat nem. Long nau, inap 2,500 yia bihain, planti man i holim yet dispela tingting olsem man i mekim stretpela pasin sapos em i no mekim samting i bagarapim ol narapela.
Yumi ken tok, dispela tok bilong Konfusas long pasin man i mas mekim i gat sampela gutpela samting long en. Tasol Baibel i kamapim narapela tingting long pasin bilong ol man na pasin bilong wok wantaim. Baibel i tok, taim man i mekim rong long narapela, em i mekim sin. Tasol Baibel i no toktok long dispela tasol, nogat; Baibel i tok tu olsem man i mekim sin sapos em i no mekim wanpela gutpela samting long narapela. Kristen disaipel Jems i tok: “Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.” (Jems 4:17) Jisas Krais i tokim ol Kristen long ol i no ken mekim nogut long ol arapela, tasol em i givim tu dispela tok long ol: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”—Matyu 7:12.
Long pastaim tru God i gat laik long olgeta manmeri i mas mekim pasin long ol arapela olsem ol i laik bai ol arapela i mekim long ol. God i stap gutpela piksa tru olsem man i tingim gut ol arapela, na dispela i kamap klia long pasin bilong em long wokim ol man: “Orait God i wokim ol manmeri na ol i kamap olsem God yet. God i mekim ol i kamap man na meri.” (Stat 1:27) Dispela i makim olsem God i wokim ol man na em i givim maus bilong bel long ol, na taim ol i skulim gut maus bilong bel, dispela inap stiaim ol long mekim pasin long ol arapela olsem ol yet i laik bai ol narapela i mekim long ol.
Planti man long nau i karim hevi long pasin bilong ol man i no gat gutpela tingting na i save tingim ol yet tasol, na i no gat gutpela samting ol dispela man inap wetim i kamap na ol i no gat man bilong helpim ol. Em nau, yumi no ken abrusim tasol pasin i no stret na bagarapim ol narapela, yumi mas mekim gut long ol na helpim ol. Long dispela as ol Witnes Bilong Jehova i amamas long helpim ol narapela long kisim save long Tok Bilong God long ol gutpela samting bai kamap bihain. Taim ol i autim gutnius bilong Baibel long ol neiba, ol i mekim olsem long pasin laikim, ol i mekim pasin long ol olsem ol yet i laik bai ol neiba i mekim long ol.