Ol Beten Bilong Yu i Gat Strong?

SAMPELA taim wanpela bikpela hevi i painim yumi na yumi no inap stretim, a? Baibel i soim olsem aposel Pol i save, beten inap senisim sampela samting long kain hevi olsem.

Taim ol i kalabusim nating Pol long Rom, em i askim ol wanbilip Kristen bilong em long beten long em, na em i tok: “Mi laikim tumas bai yupela i prea long God i helpim mi, na bai mi ken i kam bek long yupela kwiktaim.” (Hibru 13:​18, 19) Long narapela taim, Pol i tok olsem em i bilip tru olsem God bai harim beten bilong em na larim em i lusim kalabus kwiktaim. (Filemon 22) Pol i lusim kalabus na em i kirap gen long mekim wok misineri.

Tasol yu ting beten inap tru long senisim sampela samting long hevi bilong yu? Ating senis inap kamap. Tasol tingim, beten i no wanpela pasin bilong lotu na em tasol, nogat. Long rot bilong en, yumi toktok wantaim gutpela na strongpela Papa bilong yumi long heven. Taim yumi beten yumi no ken pret long tokaut stret long ol hevi bilong yumi, tasol yumi mas stap isi na wet na lukim olsem wanem Jehova bai helpim yumi.

Ating bai God i no bekim wantu olgeta beten, na i no olgeta taim em bai mekim ol samting olsem yumi beten askim em long en o long taim yumi ting em bai mekim, nogat. Planti taim Pol i bin beten long God i tekewe ‘wanpela samting olsem nil i sutim skin bilong em.’ God i no bin pinisim hevi bilong Pol, tasol em i strongim Pol long dispela gutpela tok: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.”​—⁠2 Korin 12:​7-9.

Yumi tu i ken bilip tru olsem maski God i no pinisim wanpela hevi bilong yumi, em bai ‘wokim rot bilong helpim yumi, olsem em bai i mekim yumi i sanap strong, na dispela traim bai i no inap daunim yumi.’ (1 Korin 10:13) I no longtaim na God bai pinisim olgeta hevi bilong ol man. Long nau taim yumi beten long God, em Man bilong “harim beten” dispela inap senisim sampela samting.​—⁠Song 65:⁠2.