Wanpela Pas i Go Long Noa

“DIA Noa, planti taim mi bin ritim stori bilong yu long Baibel na olsem wanem yu bin wokim sip na bai yu na famili bilong yu i ken abrusim bagarap long taim bilong Bikpela Tait.”

Dispela tok em kirap bilong pas wanpela yangpela meri i gat 15 krismas, nem bilong em Minnamaria i bin raitim bilong insait long resis bilong raitim pas em ol sumatin i gat 14 i go 21 krismas i mekim. Ol lain bilong posofis bilong Finlan, lain Federation for Finnish Mother Tongue Teachers, na lain Finnish Literature Society, ol i stretim rot bilong ol sumatin i ken mekim olsem. Ol sumatin i insait long dispela resis i mas rait i go long man em wanpela buk i stori long en. Ol i ken raitim pas i go long man i bin raitim buk o man em stori bilong em i stap long buk. Ol tisa i makim moa long 1,400 pas bilong ol sumatin na i salim ol pas i go long ol jas long skelim. Ol dispela jas i makim wanpela gutpela pas tru i kisim namba wan prais, na ol i makim 10-pela gutpela pas i kisim namba tu prais, na 10-pela gutpela pas i kisim namba tri prais. Minnamaria i amamas olsem em i kisim namba tri prais.

Bilong wanem dispela yangpela sumatin, i raitim pas i go long Noa, wanpela man i bin stap olsem 5,000 yia i go pinis? Minnamaria i tok: “Baibel em namba wan buk mi bin tingim. Mi save long stori bilong ol man Baibel i stori long ol. Mi ritim stori bilong ol planti taim, na long tingting bilong mi i olsem ol i stap laip. Mi makim Noa, long wanem, planti samting i bin painim em na sindaun bilong em i narapela kain long sindaun bilong mi.”

Long pinis bilong pas Minnamaria i raitim i go long Noa, em i tok olsem: “Yu stap yet olsem gutpela piksa long pasin bilong bilip na bihainim tok. Ol samting i kamap long laip bilong yu i strongim olgeta husat i ritim Baibel long ol i mas bilip na bilip i mas kirapim ol long mekim samting.”

Dispela yangpela i save ritim Baibel na pas bilong em i kamapim klia olsem “tok bilong God em i gat laip, na em i wok strong i stap.”​—⁠Hibru 4:⁠12.