“Mipela i Laik Tok, ‘Yes!’ ”

I NO longtaim i go pinis brens ofis bilong ol Witnes Bilong Jehova long Naijiria i kisim wanpela pas, hap bilong pas i gat dispela tok:

“Pikinini man bilong mipela Anderson, i dai taim em gat 14 krismas. Taim em i no dai yet, em i bin lukautim tupela kakaruk. Em i laik salim ol bilong kisim mani na salim mani olsem kontribiusen i go long brens ofis bilong helpim wok bilong autim tok long olgeta hap. Tasol em i bin dai paslain long em i salim ol kakaruk.

“Mipela, papamama bilong em, i tingim dispela laik bilong em na mipela i lukautim tupela kakaruk na salim ol. Mipela i salim mani i go long yupela olsem kontribiusen bilong Anderson. Tok promis bilong Jehova i mekim na mipela i bilip tru olsem i no longtaim⁠​—⁠klostu nau​—⁠mipela bai lukim Anderson gen. Mipela i laik tok, ‘Yes!’ taim em i askim mipela olsem mipela i bin mekim samting em i bin laik long mekim o nogat. Tru tumas, mipela i wet long lukim Anderson na ‘ol dispela manmeri olsem bikpela klaut’ em ol tu bai kirap bek.”​—⁠Hibru 12:1; Jon 5:​28, 29.

Olsem pas antap i kamapim klia, bilip bilong kirap bek em samting i strongim tru ol trupela Kristen. Man! Bikpela amamas tru planti milion famili bai kisim taim ol, wankain olsem famili bilong Anderson, i lukim gen ol man ol i laikim tumas em dispela birua, dai, i bin kisim ol!​—⁠1 Korin 15:​24-26.

Dispela tok bilong Baibel long kirap bek, em wanpela bilong planti gutpela samting klostu nau bai kamap tru long nupela taim i gat stretpela pasin long en, aninit long Kingdom Bilong God. (2 Pita 3:13) Baibel i tok long samting God bai mekim long ol manmeri long dispela taim, olsem: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:⁠4.