“Em Gutpela Samting Tru Yu Inap Mekim”

ALEXIS i gat 5-pela krismas na em i wanpela mangi long taun Morelia, long Meksiko. Papamama bilong em i stadi long Baibel na i go long ol miting bilong ol Witnes Bilong Jehova. Taim em i go wantaim famili bilong em long wanpela kibung sekit, em i lukim wanpela soim bilong wok autim tok long ol haus. Wantu em i tanim long papa na i askim em: “Papa, Papa, bilong wanem yu no go na autim tok?” Papa i bekim tok: “Mi wok long stadi yet na bai mi ken mekim dispela wok.” Alexis i amamas na i tok: “Papa, em gutpela samting tru yu inap mekim.”

Dispela liklik mangi i luksave olsem em i mas mekim samting i stret long save em i kisim long Jehova. Tupela liklik kasen bilong em i stap wantaim em long wanpela haus, olsem na pastaim em i beten long Jehova na bihain em i toktok wantaim ol long ol stori bilong Baibel Stori Buk Bilong Mi, em papamama i lainim em long en. Maski Alexis i no save yet long rit, em i save gut long ol stori long rot bilong ol piksa. Em i tok tu olsem em i laik go long ol haus na tokim ol man long ol samting God i tingting pinis long mekim.

Em nau, ol yangpela na lapun wantaim inap senisim pasin bilong ol na mekim pasin i stret long samting Jehova, em Man Holi, i laik ol i mas mekim. Sapos ol i mekim olsem ol inap mekim dispela nambawan gutpela wok bilong autim tok long Jehova namel long olgeta lain. (Aisaia 43:​3, NW; Matyu 21:16) Tru tumas, dispela em wanpela gutpela samting tru man inap mekim.