Rot Bilong Daunim Bel Hevi
OLSEM WANEM? Yu stap bel hevi? Nau long dispela taim nogut i gat planti pait na ol man i no save wanem samting bai kamap, planti man i stap bel hevi. Sampela i bel hevi, long wanem, ol i no gat wok mani. Sampela i mas karim hevi bilong bagarap ol i bin kisim. Ol narapela i mas karim ol hevi bilong famili, wanpela bikpela sik, o ol i pilim olsem ol i stap wanpis.
Sapos yu bel hevi, yu ken go long husat bilong kisim helpim? Planti milion man long olgeta hap bilong graun i stap belgut taim ol i ritim Tok Bilong God, em Baibel. Tok bilong aposel Pol i strongim ol, em i tok: “Yumi litimapim nem bilong God, em i God na Papa bilong Bikpela bilong yumi Jisas Krais. Em i Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela.” (2 Korin 1:3, 4) I gutpela sapos yu ritim dispela skripsa na ol narapela skripsa long Baibel bilong yu yet. Sapos yu mekim olsem em bai ‘strongim bel bilong yu.’—2 Tesalonaika 2:17.
Yu inap kisim helpim tu bilong daunim bel hevi taim yu bung wantaim ol man i lotuim Jehova. Sindaun 12:25 i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” Taim yumi go long ol miting Kristen, yumi harim dispela “gutpela tok,” em i “swit moa na i save strongim bodi bilong ol manmeri.” (Sindaun 16:24) I gutpela sapos yu go long Haus Kingdom bilong ol Witnes Bilong Jehova na bai yu yet i ken pilim olsem wanem pasin bilong dispela kain bung i save strongim man.
Beten tu i gat strong bilong helpim yu. Sapos ol samting bilong laip bilong yu i mekim yu tingting planti, kamapim ol samting i stap insait tru long bel bilong yu long Man Bilong Harim beten. (Song 65:2) Man Bilong Wokim yumi, God Jehova, em i save gut moa long yumi winim yumi yet. Yumi ken bilip tru long em bai helpim yumi. Baibel i tok promis olsem: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Tru tumas, “ol manmeri i bilip long Bikpela na i wetim em i helpim ol, ol bai i stap strong oltaim.”—Aisaia 40:31.
God Jehova i bin givim yumi ol samting i gat strong bilong helpim yumi long daunim bel hevi. Olsem wanem? Bai yu mekim wok long ol?