Em i No Wanpela Pilai Nating Tasol
OL PIKININI i save laikim pilai. Tasol buk The Developing Child i tok: “Dispela pasin i no samting nating tasol o samting em bai lus nating, nogat. Ol pilai i save helpim pikinini long lain long wokim gut tingting.” Taim ol pikinini i pilai, ol i lain long yusim tingting, na lain long toktok na wok gut wantaim ol narapela.
Long taim ol pikinini i gat fopela o faipela krismas, ol bai kirap bihainim pasin bilong ol bikpela man long ol pilai ol i mekim. Wanpela taim Jisas i toktok long ol pikinini i mekim pilai. Sampela i laik mekim pilai i makim man i mekim tok bilong marit, na sampela i mekim pilai i makim man i givim tok bilong planim man i dai, na olsem planti taim ol pikinini i save mekim, ol i save tok pait, long wanem, sampela i no laik insait long pilai. (Matyu 11:16, 17) Dispela kain pilai i save pas strong long tingting bilong ol taim ol i wok long i go bikpela.
Long dispela ol piksa, ol pikinini i mekim pilai i makim wanpela tisa bilong Baibel na sumatin. Ol i no mekim tru tru wanpela Baibel stadi, tasol save ol i kisim long pasin bilong skulim man long Baibel em i klia long tingting bilong ol. Dispela em i bikpela samting, long wanem, Jisas i tokim lain bilong em long mekim ol manmeri i kamap disaipel na skulim ol long bihainim olgeta tok em i bin skulim ol long en.—Matyu 28:19, 20.
Ol papamama em ol pikinini bilong ol i save giaman pilai olsem ol i mekim Baibel stadi, givim tok long pletfom, o autim tok long ol haus, i stret ol i ken amamas. Em pasin bilong ol pikinini long bihainim pasin ol i lukim long ol bikpela manmeri i stap wantaim ol. Ol pilai bilong Baibel ol i mekim i kamapim olsem papamama i save “skulim ol long tok bilong Bikpela.”—Efesus 6:4.
Jehova i laik bai ol pikinini i mas insait long pasin bilong mekim lotu long em. Em i tokim Moses long singautim tu ol “pikinini” taim ol i ritim tok bilong Lo. (Lo 31:12) Sapos ol pikinini i insait long ol miting, pilai ol i mekim bai kamapim dispela. Na pikinini husat i mekim pilai i makim olsem em i wokman bilong God, em i stat long mekim namba wan samting long rot bilong kamap wanpela wokman bilong God.