Yu Laik Bai Wanpela Taim i Kamap we i No Gat Man i Pret?

‘Yumi stap long wanpela taim we ol man i save was i stap na . . . pret, long wanem, bagarap inap kamap long kain kain taim na rot, no gat toksave.’

MAGASIN Newsweek i mekim dispela tok long las yia​—⁠em i kamapim tingting bilong planti man nau long dispela taim nogut. Jisas Krais i kamapim olsem klostu nau kain pasin bai kamap strong moa. Em i tok profet long wanpela taim we long olgeta hap tingting bilong ol manmeri bai bagarap tru, na i no gat rot bilong abrusim, na ol man bai tingting planti long ol samting i laik kamap long graun na pret moa yet. Tasol yumi no ken pret o ting yumi no gat helpim, Jisas i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.”​​—⁠Luk 21:​25-​28.

God Jehova i stori long sindaun bilong ol lain bilong em long graun bihain long taim em i kisim bek ol, olsem: “Ol manmeri bilong [mi] bai i gat gutpela sindaun na bai ol i stap gut na malolo long ol ples bilong ol. Na bai ol i no pret long wanpela samting.” (Aisaia 32:18) Long rot bilong profet bilong em, Maika, Jehova i tok: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”​​—⁠Maika 4:⁠4.

Em narapela kain long sindaun bilong ol man long nau! No gat wanpela kain bagarap bai pretim ol man. Bai i no gat pasin bilong ol man i was long olgeta taim na ol i no inap mekim wanpela samting, nogat, bel isi na amamas bai i stap oltaim.