‘Mi Amamas Long Skul Mi Kisim’

YANGPELA Kazuna i kirap nogut tru taim tisa bilong em i tokim em long insait long wanpela resis bilong givim wanpela tok long Inglis. Olgeta haiskul long bikpela ailan Hokkaido long hap not bilong Japan inap insait long dispela resis, tasol skul bilong Kazuna i no bin makim yet wanpela sumatin long insait long dispela resis bipo. Long de bilong resis, Kazuna i pret, long wanem, em i mas resis wantaim 50 narapela sumatin. Em i pret moa yet taim em i lukim tupela man bilong bosim resis em tok Inglis i tok ples bilong ol.

Ol i tokaut long ol sumatin i winim ol prais, kirap long sumatin i kisim laspela prais na i go. Taim ol i kolim nem bilong Kazuna olsem em i kamap namba wan, em i kirap nogut tru. Em na tisa bilong em, husat i sindaun klostu long em, ol i kirap nogut tru na narapela i lukluk long narapela. Orait nau Kazuna i wokabaut i go long pletfom na kisim prais bilong em​—⁠em namba wan prais!

Kazuna i amamas na i tok: “Mi inap mekim dispela tok, long wanem, mi kisim gutpela skul long oganaisesen bilong Jehova long rot bilong Skul Tiokratik. Mi amamas tru long mi inap kisim dispela skul.” Dispela skul Kazuna i insait long en kirap long taim em i liklik yet, em i wanpela miting bilong kongrigesen bilong ol Witnes Bilong Jehova. Taim em i wok long redi long dispela resis, Kazuna i tingim pasin bilong mekim gut wok long maikrofon, mekim tok long gutpela pasin na givim bel long mekim, wokim han, pasin bilong lukluk long ol man, na ol narapela samting em i lain long Skul Tiokratik.

Mipela i laik singautim yu long kam na lukim dispela skul ol Witnes i save mekim long olgeta wik long ol Haus Kingdom bilong ol Witnes Bilong Jehova. Long dispela rot yu ken lukim olsem wanem ol yangpela na ol lapun wantaim i kisim helpim. Olgeta man i ken kam long miting. Bilong kisim sampela save moa long dispela skul i kamap klostu long ples bilong yu, plis askim ol Witnes Bilong Jehova long hap yu stap long en.