Taim Bilong Kaikai—Em i No Taim Bilong Kaikai Tasol!
OLGETA man i save amamas long gutpela kaikai. Tasol taim yu sindaun na kaikai wantaim ol man yu laikim tumas na yupela i toktok gut na pren gut wantaim, orait nau dispela kaikai i kamap olsem wanpela taim bilong amamas na i no taim bilong inapim hangre tasol. Planti famili i save bung wantaim long wanpela taim long de bilong kaikai wantaim. Taim bilong kaikai i givim rot long famili long toktok wantaim long ol samting i kamap long dispela de o ol samting ol i laik mekim. Ol papamama husat i save putim gut yau long ol tok bilong ol pikinini, ol bai kisim liklik save long tingting na ol filings bilong ol pikinini. Bihain, pasin bilong bung wantaim na amamas long taim bilong kaikai bai strongim ol arapela insait long famili long i stap bel isi, bilip long arapela, na laikim tru ol.
Long nau, planti famili i hatwok long bung na kaikai wantaim, long wanem, planti long famili i bisi long olgeta taim. Long sampela hap bilong graun, pasin bilong ples i pasim famili long kaikai wantaim o toktok wantaim long taim bilong kaikai. Sampela famili i gat pasin bilong larim TV i stap op long taim bilong kaikai, na dispela i pasim ol long toktok gut wantaim.
Tasol long olgeta taim ol papamama Kristen i laik painim rot bilong strongim ol pikinini. (Sindaun 24:27) Bipo tru, Baibel i tokim ol papamama long wanpela gutpela rot tru long lainim ol pikinini long ol tok bilong God, em long ‘taim ol i stap long haus.’ (Lo 6:7) Pasin bilong sindaun oltaim wantaim famili long taim bilong kaikai i save opim wanpela gutpela rot long ol papamama long strongim ol pikinini long laikim tru Jehova na ol stretpela stiatok bilong em. Sapos yu kamapim pasin bilong amamas na bel isi long taim bilong kaikai, yu tu inap mekim na dispela taim i kamap wanpela gutpela taim bilong amamas na narapela i ken strongim narapela. Yes, wok strong long mekim taim bilong kaikai i kamap wanpela gutpela taim bilong amamas na i no taim bilong kaikai tasol.