“Yu Mekim Olsem Wanem?”

DISPELA askim em wanpela lapun man i mekim long wanpela haus kaikai, na Muriel, em mama i gat 3-pela pikinini em i kirap nogut long en. Muriel i bisi long i go kam long dokta wantaim ol pikinini bilong em, na em i leit long mekim ol samting. Ol i no gat inap taim bilong go long haus na kisim kaikai bilong apinun pastaim long go long miting Kristen. Olsem na em i kisim ol pikinini i go long wanpela haus kaikai klostu na bai ol ken kisim sampela kaikai.

Taim ol i wok long pinis long kaikai, wanpela man i kam long Muriel na i tok: “Mi wok long lukluk long yu long taim yu kam insait long hia. Na mi bin lukim sampela samting long ol pikinini bilong yu i narapela kain long ol pikinini mi save long ol. Man! Yu mas lukim pasin bilong ol dispela pikinini long holim nabaut ol tebol na sia. Putim ol lek bilong ol antap long tebol. Subim na senisim nabaut ol sia. Tasol ol pikinini bilong yu i stap isi na ol i sindaun gut. Yu mekim olsem wanem?”

Muriel i tok: “Mitupela man bilong mi i save stadi long Baibel olgeta taim wantaim ol pikinini bilong mipela, na mipela traim long bihainim ol tok mipela i lainim long i stap bilong mipela. Mipela i Witnes Bilong Jehova.” Taim em i tok olsem, man i tok: “Mi wanpela Juda na man i bin abrusim bikpela bagarap bilong ol Natsi. Mi tingim mi bin lukim ol Natsi i bin mekim nogut long ol Witnes Bilong Jehova long Jemani. Maski olsem, ol i stap narapela kain. Pasin bilong ol pikinini bilong yu i kirapim mi tru. Mi mas kisim gut save long lotu bilong yu.”

Baibel i gutpela buk tru bilong stiaim papamama long mekim bikpela long ol pikinini. Ol Witnes Bilong Jehova i laik tru long helpim ol narapela long kisim helpim long ol tok bilong Baibel. Mipela i singautim yu long bihainim dispela tok daunbilo.