Husat Bai Givim Kaikai Long Olgeta Manmeri?

WANPELA oganaisesen bilong Yunaitet Nesen (World Food Programme) i tok olsem, 800 milion manmeri⁠​—⁠planti bilong ol em ol pikinini⁠—​ol i stap long mak bilong dai long hangre. I no longtaim i go pinis dispela oganaisesen i bin tok olsem ol mani na save ol strongpela kantri i gat bilong daunim dispela hevi ol i no inap givim, long wanem, olgeta dispela samting ol i tromoi bilong stretim ol narapela kain hevi olsem pasin teroris. Hevi bilong ol sik i save kalap long ol narapela i mekim na hevi bilong hangre i go nogut moa moa yet. Wanpela ripot (Global School Feeding Report) i tok long ol kantri bilong Afrika we sik AIDS i go bikpela tru olsem: “Olgeta papamama bilong ol dispela pikinini ol i dai long dispela sik taim ol i yangpela yet. Olsem na ol pikinini ol i lusim i mas mekim ol samting bilong helpim ol yet, planti bilong ol i nogat save long wok gaden na wok bilong lukautim ol yet, em ol save ol i mas kisim long rot bilong papamama bilong ol.”

Lain World Food Programme i laik kirapim wanpela plen we ol i givim kaikai long ol pikinini long skul wanpela taim long de. Astingting bilong dispela i olsem ol i laik daunim hevi bilong hangre na tu, long rot bilong kam oltaim long skul ol i laik kirapim sampela program em ol i bin redim bilong pasim sik HIV/AIDS namel long ol yangpela.

Long ol hap we dispela plen i kamap pinis, ol pikinini i bin kisim ol kaikai, lain long pasin bilong stap klin, na ol arapela helpim. Ol i luksave tu olsem taim ol manmeri i senisim pasin bilong ol, namba bilong ol manmeri i kisim sik HIV/AIDS i go daun.

Tasol sori tru, ol hatwok bilong ol man i save helpim sampela tasol na i no inap pinisim tru dispela hevi. Tasol Baibel i mekim wanpela gutpela tok promis bilong stretim tru tru dispela hevi bilong hangre. Song 72:16 i tok: “Planti rais na wit samting i ken kamap long ol gaden bilong ol manmeri.” Taim Kingdom Bilong God i bosim graun, ol manmeri bai inap long mekim tok long God Jehova olsem: “Yu save salim ren i kam na long dispela pasin yu lukautim gut graun. . . . Dispela i save mekim kaikai i kamap planti na ol manmeri i kisim. Dispela wok yu yet yu bin mekim.”​​—⁠Song 65:⁠9.

[Piksa Kredit Lain long pes 32]

WFP/Y. Yuge