Gutpela Pasin i ‘Givim Biknem Long Tok Bilong God’
MARIA, wanpela yangpela meri i stap long Kransnoyarsk, Rasia, i singsing gut tru, olsem na tisa bilong em i makim em long insait long lain bilong mekim singsing long skul. I no longtaim na long gutpela pasin Maria i go stori long wanpela tisa bilong em olsem i gat sampela singsing em i no inap mekim. Bilong wanem? Long wanem, ol singsing i stori long ol samting bilong lotu i pait wantaim ol bilip bilong em long Baibel. Tisa i kirap nogut na i askim em: ‘Wanem samting i rong long givim biknem long God long rot bilong mekim wanpela singsing?’
Bilong soim tisa long as na em i no laik mekim wanpela singsing i toktok long God Triwan, Maria i bin opim Baibel bilong em na soim tisa olsem God na Jisas Krais ol i no wanpela God, na holi spirit em i strong bilong God. (Matyu 26:39; Jon 14:28; Aposel 4:31) Maria i tok: “Maski dispela samting i kamap, mi pas gut yet wantaim tisa bilong mi. Na tu, mipela i gat ol gutpela tisa long skul bilong mipela. Ol i laik long mipela i mas bihainim pasin bilong mipela yet.”
Taim Maria i skul, pasin bilong holimpas bilip bilong em i mekim na ol tisa na ol wanklas bilong em i rispek long em. Maria i tok: “Ol stiatok bilong Baibel i helpim mi long laip bilong mi. Taim skul i pinis, mi bin kisim wanpela prais long pasin bilong tok tru na pasin bilong stretim gut ol samting. Papamama tu i bin kisim wanpela pas bilong tok tenkyu i kam long skul long gutpela pasin bilong ol long skulim mi gut.”
Maria i bin baptais long Ogas 18, 2001. Em i tok: “Mi amamas olsem mi inap long mekim wok bilong wanpela gutpela God tru olsem Jehova!” Ol yangpela Witnes Bilong Jehova long olgeta hap i bihainim tru tok bilong Taitus 2:10, em i tok: “Long olgeta samting ol i mekim, ol wokboi bai i kirapim ol man long givim biknem long dispela tok yumi save autim, em tok tru bilong God, em Man bilong kisim bek yumi.”
[Piksa long pes 32]
Pas bilong tok tenkyu na setifiket bilong soim olsem em i winim skul
[Piksa long pes 32]
Maria na papamama bilong em bihain long em i kisim baptais