Man Afrika i Gat Pasin Daun i Laikim Tru Tok Bilong God
PLANTI visita i go long Afrika i bin kirap nogut long lukim olsem i no hatwok long toktok wantaim ol asples long ol tok bilong Baibel. “Kingdom Bilong God em i wanem samting?” “I gat rot bilong pinisim ol kain hevi olsem sot long kaikai, sik, woa, na pasin raskol?” Ol kain askim olsem inap kirapim ol man long putim gut yau. Planti bilong ol bai amamas long larim wanpela man ol i no save long en, i kamapim ol tok bilong Baibel bilong bekim ol dispela askim. Planti taim dispela i save kirapim ol long stadi long Baibel. Na taim ol sumatin i kamap strong long samting bilong spirit, ol i kisim baptais na kamap Kristen.
Long Aposel 8:26-40, Baibel i stori long namba wan man Afrika i bin mekim olsem. Em man Itiopia husat i bin kam long Jerusalem bilong lotuim trupela God, em Jehova.
Olsem yu lukim long piksa daunbilo, dispela man Itiopia i sindaun long karis bilong em na i go bek long ples bilong em na em i wok long ritim wanpela buk. Wanpela man em i no save long en, i go klostu long em na i askim em: “Ating yu save long as bilong dispela tok yu ritim, o nogat?” Long pasin daun, man Itiopia i tokaut long em i mas kisim helpim na em i singautim dispela man em i no save long en, em Filip, wanpela Kristen, long kalap antap long karis. Orait nau em i askim Filip long stori long mining bilong ol Tok Bilong God em i bin ritim. Filip i tokim em olsem dispela i wanpela tok profet i stori long dai bilong Mesaia, em Krais Jisas. Filip i stori long ol narapela samting bilong “gutnius bilong Jisas,” na long kirap bek bilong Jisas tu.
Taim em i harim pinis olgeta dispela gutpela tok i tru, dispela man Itiopia i laik kamap disaipel bilong Jisas na em i askim olsem: “Ating wanpela samting i pasim rot na mi no inap kisim baptais?” Bihain long em i kisim baptais, dispela man Afrika i go bek long ples bilong em, na Baibel i no stori moa long em.
Long nau, ol Witnes Bilong Jehova i helpim planti milion manmeri long olgeta hap bilong graun long kisim save long wankain “gutnius” tasol. Long nau ol Witnes i save stadi long Baibel wantaim klostu 6 milion manmeri.