Helpim Ol Manmeri Long Masedonia

“YU MAS brukim solwara na yu kam long Masedonia na helpim mipela.” (Aposel 16:9) Long wanpela driman, wanpela man i mekim dispela tok long aposel Pol na dispela i soim olsem i mas i gat man bilong autim gutnius bilong Kingdom Bilong God long wanpela nupela teritori, em long sampela taun i stap nau long Grik.

Long Masedonia long nau, long olgeta 1,840 man wanpela tasol i Witnes Bilong Jehova. Planti manmeri i no save liklik long God Jehova. Tru tumas, ol manmeri bilong Masedonia i mas harim gutpela tok bilong bel isi.​—Matyu 24:14.

God i bin opim rot bilong ol i ken harim dispela gutpela tok. Wanpela de long Novemba 2003, wanpela lain i ring long ofis bilong ol Witnes Bilong Jehova long Skopje. Dispela lain em Macedonian Center for International Cooperation. Kirap long Novemba 20 ol bai wokim wanpela so inap tripela de, na ol i singautim ol Witnes long putim wanpela liklik haus we ol i ken kamapim bilip bilong ol. Man! Em wanpela gutpela rot stret bilong autim tok long planti tausen manmeri em ol i no bin harim gutnius bilong Kingdom bipo!

Ol Witnes i wok strong long stretim ol samting na redim ol buk na nius bilong ol Witnes Bilong Jehova long tok ples Masedonia. Ol i putim ol buk na nius antap long wanpela tebol na bai ol man i kam raun lukim ol samting ol i ken kisim. Long rot bilong ol buk na nius, planti manmeri inap kisim wara bilong spirit i no gat pe bilong en.​—KTH 22:17.

Planti manmeri i laikim ol buk na nius i stori long ol samting i save kamap long i stap bilong ol, olsem buk Sampela Askim Bilong Ol Yangpela​—Ol Gutpela Bekim na buk Rot Bilong Famili i Ken Stap Amamas.a Inap 98 manmeri i givim atres bilong ol, na ol i laik ol Witnes Bilong Jehova i ken go lukim ol. Planti man i mekim gutpela tok long wok bilong ol Witnes Bilong Jehova na long ol buk na nius ol i wokim.

Wanpela man i holim han bilong liklik pikinini man bilong em na tupela i kam long haus ol Witnes i putim ol samting long en. Papa i askim ol long ol i gat ol buk o nius samting bilong ol pikinini o nogat. Ol Witnes i soim em buk Baibel Stori Buk Bilong Mi.b Em i opim buk na lukim ol tok i stap insait na em i amamas tru na askim ol Witnes long pe bilong dispela buk. Taim em i kisim save olsem long laik bilong ol man yet, ol i save givim mani bilong helpim wok bilong ol Witnes Bilong Jehova long skulim ol man, em i amamas moa yet. (Matyu 10:8) Em i soim buk long pikinini man bilong em na tok: “Em gutpela buk tru! Papa bai ritim wanpela stori long yu long olgeta de!”

Wanpela profesa i kam long dispela haus ol Witnes i stap long en. Em i laik save long ol lotu, na moa yet long bilip bilong ol Witnes Bilong Jehova. Taim em i lukim buk Mankind’s Search for God,c em i tok: “Man! Ol i kamapim gut ol tok long dispela buk! Em wankain stret long tingting bilong mi long olsem wanem wanpela buk i mas kamapim ol dispela tok.” Bihain sampela sumatin long skul i kam na ol tu i laik kisim dispela buk em profesa bilong ol i bin kisim. Ol i laik stadi long wankain buk. Ol i ting em bai mekim wok long dispela buk taim em i skulim ol.

Long rot bilong dispela so, em i namba wan taim bilong sampela manmeri long ritim na harim tok i tru bilong Baibel. Sampela yangpela yaupas i kam raun bilong lukim olsem i gat sampela samting ol bai laikim o nogat. Wanpela Witnes i stori liklik long ol, na wanpela yangpela meri i tanim tok bilong dispela Witnes i go long tok ples sain bilong ol yaupas. Dispela Witnes i mekim wok long ol piksa long buk Nambawan Man Tru i Winim Olgeta Narapela Man,d na em i tokim ol olsem Jisas i bin oraitim ol sikman, na ol yaupas tu. Ol i amamas tru long kisim save long tok promis bilong Baibel olsem klostu nau Jisas bai mekim wankain samting long ol man i stap long graun long taim bilong yumi. Sampela bilong ol i amamas long kisim sampela buk na nius bilong Baibel, na ol i stretim rot bilong wanpela Witnes i save long tok ples sain i go lukim ol.

Ol i redim ol buk na nius long tok ples Masedonia, na tu, long tok ples Albenia, Inglis, na Teki. Wanpela man i no save long tok ples Masedonia i askim ol Witnes long kisim sampela buk na nius long tok Inglis. Taim ol i givim em pinis ol Wastaua na Kirap!, em i tokim ol olsem em i save long tok ples Teki. Em i kirap nogut tru, taim ol Witnes i soim em ol buk na nius long tok ples bilong em yet! Em i luksave olsem ol Witnes Bilong Jehova i laik helpim olgeta man.

Long rot bilong dispela so ol Witnes inap autim tok long ol man, na planti manmeri i laik kisim save long tok i tru bilong Baibel na dispela i strongim ol Witnes. Tru tumas, Jehova i opim rot bilong planti manmeri moa i ken harim gutnius bilong Kingdom long Masedonia.

[Ol Futnot]

[Blok/Ol Piksa long pes 9]

WANPELA BIKPELA SAMTING!

Long Me 17, 2003, wanpela bikpela samting i kamap bilong helpim wok bilong ol Witnes long autim gutnius bilong Kingdom Bilong God long Masedonia. Ol i dediketim wanpela nupela ofis bilong ol Witnes Bilong Jehova long Skopje. Ol i bin wok inap tupela yia bilong pinisim dispela ofis, na nau bikpela bilong en i winim olpela ofis inap 4-pela taim.

I gat tripela haus. Wanpela i gat ol ofis na ples bilong tanim tok, na wanpela i gat ol rum bilong slip, na narapela i gat haus kuk, na ples bilong wasim klos. Brata Guy Pierce, em i wanpela bilong Gavening Bodi bilong ol Witnes Bilong Jehova, i mekim tok bilong dediketim ol dispela haus. Ol manmeri bilong 10-pela kantri i kam bilong harim program bilong dedikesen. Olgeta i amamas long lukim ol dispela nupela haus.

[Mep long pes 8, 9]

(Bilong save ol dispela rait i stap we long pes, lukim buk o magasin)

BALGERIA

MASEDONIA

Skopje

ALBENIA

GRIK

[Piksa long pes 8]

Skopje, Masedonia