Ol Stori Bilong Baibel​—Ol i Stret?

LONG buk bilong ol (Battles of the Bible), Chaim Herzog, bipo em i presiden bilong Israel, na Mordechai Gichon, em wanpela profesa bilong painim ol samting bilong bipo, long Yunivesiti Bilong Tel Aviv, ol i tok olsem:

“Ol stori bilong ol pait long Baibel . . . ol man i no inap kamapim nating ol dispela stori long bihain. Yumi ken save long dispela sapos yumi tingim pait Gideon i mekim long lain Midian na ol lain i helpim ol, olsem i stap long Hetman, sapta 6-8, na skelim wantaim Pait Bilong Ol Trojan, em Homa i stori long en long buk Iliad. Pait bilong ol Trojan inap kamap long kain kain hap i gat nambis na wanpela taun i gat strongpela banis i stap klostu long dispela nambis . . . Tasol stori bilong Baibel long pait bilong Gideon i no olsem. Baibel i stori gut long pasin bilong mekim dispela pait na i kolim stret ol ples we ol i bin pait na ol samting tupela lain i bin mekim​—hap we ol bikpela samting bilong pait i bin kamap long en, em 60 kilomita samting​—dispela pait i no inap kamap long kain kain hap, em i mas kamap long dispela hap stret . . . Dispela i mekim na yumi ken bilip tru long ol stori bilong ol pait em Baibel i stori long en.”

Taim yu skelim pait bilong Gideon, i gutpela yu lukim mep long pes 18 na 19 long buklet “See the Good Land.”a Dispela stori i kirap taim “ol Midian na ol Amalek, na ol lain man bilong ples wesan nating ol i bung i stap. Ol i brukim wara Jordan na wokim kem long ples daun bilong Jesril.” Gideon i bin singautim sampela lain i stap klostu long helpim em. Ol i wokim kem long arere bilong wara Harot na i go pait daunbilo klostu long maunten bilong More, na bihain ol i go pait long ples daun bilong wara Jordan. Gideon na lain bilong em i ranim ol birua i go long hapsait bilong wara Jordan, na daunim ol.​—Hetman 6:33–8:12.

Dispela mep long buklet “See the Good Land” i soim ol hap we dispela pait i kamap long en, na em maunten o ples daun samting. Narapela mep (pes 15) i soim ol hap graun bilong ol wan wan lain bilong Israel. Dispela tupela mep inap helpim yu long luksave olsem dispela stori long pait bilong Gideon i tru.

Dispela i strongim tok bilong Profesa Yohanan Aharoni, em i dai pinis, em i tok: “Long hap bilong Palestain, ol samting bilong kantri na ol samting i bin kamap long dispela kantri long bipo i pas strong wantaim. Yumi mas save long tupela samting wantaim na dispela bai helpim yumi long save gut long ol samting bilong dispela hap.”

[Futnot]

[Piksa Kredit Lain long pes 32]

Background map: Based on maps copyrighted by Pictorial Archive (Near Eastern History) Est, and Survey of Israel