Yu Wokim Haus Antap Long Wanem Samting?
BILONG haus i ken sanap strong, haus i mas i gat strongpela as bilong en. Sampela taim Baibel i mekim tok piksa long dispela stiatok bilong makim sampela samting.
Olsem: Profet Aisaia i tok long God Jehova olsem dispela man i “bin wokim na strongim as bilong graun.” (Aisaia 51:13) Dispela tok as bilong graun em tok piksa na i makim ol lo bilong God i no save senis senis, ol dispela lo i bosim wokabaut bilong graun na i stap long ples stret bilong en. (Song 104:5) Tok Bilong God, em Baibel, i tok piksa tu long ol samting i olsem “as “ bilong ol wok bilong bosim ol lain man. Em stretpela pasin, na lo bilong bosim ol samting i stap stret. Taim pasin bikhet, korapsen, na paitim nogut ol man i daunim stretpela pasin, nau ol lain man i no stap gut moa.—Song 11:2-6, NW; Sindaun 29:4.
Dispela stiatok i stret tu long yumi wan wan. Taim Jisas Krais i pinisim Bikpela Tok Long Maunten, em i tok: “Man i harim dispela tok bilong mi na i bihainim, em i olsem wanpela man i gat gutpela tingting, na em i wokim haus bilong en antap long ples ston. Na ren i kam daun, na tait bilong wara i kamap, na win i kirap strong, na ol dispela samting i sakim dispela haus. Tasol em i no pundaun, long wanem, simen bilong dispela haus em i pas strong tru long bikpela bikpela ston insait long graun. Tasol man i harim dispela tok bilong mi na i no bihainim, em i olsem wanpela longlong man i sanapim haus bilong en antap long wesan tasol. Na ren i kam daun, na tait bilong wara i kamap, na win i kirap strong. Na ol dispela samting i sakim dispela haus, na em i pundaun. Yes, em i pundaun nogut tru.”—Matyu 7:24-27.
Yu wokim haus bilong yu, olsem i stap bilong yu, antap long wanem samting? Yu wokim antap long samting i olsem wesan, em ol save bilong ol bikhet man bilong graun, em bihain bai i pundaun? O yu wokim antap long samting i olsem ol strongpela ston, em pasin bilong bihainim ol tok bilong Jisas Krais, na dispela pasin bai helpim yu long sanap strong taim ol hevi olsem bikpela win na ren i painim yu?