“Ol i Mekim Nogut Long Em Long Wanem Em i Holimpas Bilip”
LONG taun Cernobbio long noten Itali ol i kamapim wanpela hap long wanpela pak bilong tingim ol man em ol narapela i bin mekim nogut long ol. Long wanpela hap plang i gat stori bilong Narciso Riet. Papamama bilong em i bilong Itali tasol mama i bin karim em long Jemani, na long 1930 samting, Riet i kamap wanpela Witnes Bilong Jehova. Long taim bilong gavman bilong Hitler, ol i bin mekim nogut long ol Witnes Bilong Jehova, long wanem, ol Witnes i no laik putim Hitler i stap namba wan na trupela God, Jehova i stap namba tu.
Riet i ranawe i go long Cernobbio taim ol polis Gestapo i painimaut olsem em i insait long wok bilong bringim ol Wastaua i kam long haus kalabus. Long Cernobbio ol i bin askim em long tanim tok bilong Wastaua long tok ples Itali na kisim i go long ol wanbilip i stap klostu. Ol birua i luksave long ol gutpela wok bilong em. Wanpela ofisa bilong polis SS na ol wokman bilong em i kam insait long haus bilong Reit, holim em, na kisim ol samting i makim olsem em i brukim lo—ol i kisim tupela Baibel na sampela pas! Ol i salim Reit i go kalabus long Jemani, long Dachau haus kalabus, na bihain ol i kilim em i dai paslain liklik long Wol Woa 2 i pinis. Hap plang long Cernobbio i tok, “Ol i mekim nogut long em, long wanem, em i holimpas bilip.”
Bilip bilong Narciso Riet na planti handet ol narapela Witnes em ol Natsi i bin mekim nogut long ol i strongim ol Kristen long nau long stap gut long Jehova, dispela Man tasol i winim olgeta narapela man na i stret ol i laik lotuim em. (KTH 4:11) Jisas i tok: “Ol manmeri i save bihainim stretpela pasin na long dispela as ol i kisim hevi long ol arapela, em ol i ken amamas.” God bai tingim ol gutpela samting ol i mekim na blesim ol long ol i bin sanap strong.—Matyu 5:10; Hibru 6:10.