“Dispela Pait Em i Pinis”

LONG yia 2002, ol Witnes Bilong Jehova i bin mekim kibung distrik long taun Mbandaka, long hap not-wes bilong Ripablik Demokratik Bilong Kongo. Taim ol i kamapim Baibel New World Translation of the Christian Greek Scriptures long tok ples Lingala, olgeta i stap long kibung i amamas tru na kalap, na sampela i krai. Bihain ol i hariap i go long pletfom bilong go klostu na lukim nupela Baibel, ol i tok: “Basuki, Basambwe,” olsem: “Dispela pait em i pinis! Ol lotu i kisim sem!”

Bilong wanem ol lain i stap long kibung i amamas nogut tru? Wanem insait bilong dispela tok bilong ol? Long sampela hap bilong Mbandaka, ol Witnes Bilong Jehova i no inap kisim Baibel long tok ples Lingala. Bilong wanem? Long wanem, ol lotu i no laik salim Baibel long ol Witnes Bilong Jehova. Ol Witnes i mas askim wanpela man i no Witnes bilong kisim wanpela Baibel bilong ol. Nau ol i amamas tru, long wanem, ol lotu i no inap pasim ol moa long kisim ol Baibel.

Dispela nupela Baibel ol i bin tanim bai helpim ol Witnes Bilong Jehova, na ol narapela man tu. Wanpela man i stap long haus bilong em na em inap harim tok i kam long ples kibung long rot bilong bikpela spika, em i raitim wanpela pas i go long brens ofis bilong ol Witnes Bilong Jehova. Em i tok: “Mi amamas long dispela nupela Baibel. Em bai givim save long mipela long planti samting. Mi no wanpela Witnes Bilong Jehova, tasol mi amamas long wetim dispela Baibel em nau tasol yupela i bin wokim.”

Baibel New World Translation of the Holy Scriptures i stap nau long 33 tok ples na Baibel Christian Greek Scriptures, i stap long 19 tok ples moa, long tok ples Lingala tu. Sapos yu laik kisim wanpela bilong dispela Baibel em ol i bin tanim gut tok bilong en, askim wanpela Witnes Bilong Jehova long olsem wanem yu ken kisim wanpela.