“Ol i Holimpas Bilip na Ol i No Surik”

JISAS i tokim ol disaipel bilong em: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas.” (Matyu 5:11) Ol Witnes Bilong Jehova long nau ol i amamas, long wanem, ol i bihainim tok na pasin bilong Krais, ol i stap olsem man “i no bilong dispela graun” na ol i no insait liklik long ol wok politik bilong dispela graun na ol i stap gut long God maski wanem hevi i painim ol.​—Jon 17:14; Matyu 4:​8-10.

Long buk Kirik keset küla, Toomas Paul, em tisa bilong lotu Luteran na man bilong tanim tok bilong Baibel, i stori long pasin bilong ol Witnes Bilong Jehova long ol kantri em bipo ol i insait long Soviet Yunion, na Estonia tu, long holimpas bilip bilong ol, na em i tok: “Planti man i no save long wanem samting i bin kamap long bikmoning bilong Epril 1, 1951. Ol i pasim tok long rausim olgeta Witnes Bilong Jehova na ol man i save bung wantaim ol long Estonia​—ol i salim 279 manmeri olgeta i go long Saibiria . . . Rot i op long ol Witnes long sainim nem bilong ol long wanpela pepa i tokaut olsem ol i lusim bilip bilong ol, na sapos ol i mekim olsem ol i no ken lusim Estonia o go long kalabus. . . . Dispela lain wantaim sampela moa ol i bin kisim pastaim na putim long kalabus em inap olsem 353​—171 bilong ol em ol lain i bung tasol wantaim ol Witnes. Ol i holimpas bilip bilong ol​—long Saibiria tu​—na ol i no surik. . . . I no planti memba bilong lotu Luteran bilong Estonia i gat pasin bilong bilip wankain olsem bilong ol Witnes Bilong Jehova.”

Ol Witnes Bilong Jehova long olgeta hap bilong graun ol i bilip long God bai helpim ol long i stap gut long em na bihainim tok bilong em maski ol man i birua long ol. Ol i amamas olsem ol bai kisim bikpela pe long pasin bilong ol long i stap gut long God.​—Matyu 5:12.